Dewleta tirk a dagirker tecrîdê li ser Rêberê Gelê Kurd Abdullah Ocalan ferz dike, derfetê nade parêzer û malbata wî ku serdana wî bikin.
Nivîskarê Kurd Diyab Hacî diyar kir ku piraniya şoreşger û rêveberên cîhanê ku têkoşiyan, yan şehîd bûn yan jî hatin girtin weke Gandî, Mandêla, gelên xwe gihandin ewlehî û azadiyê.
Diyab Hacî destnîşan kir ku di vê sedsalê de Ocalan tekane têkoşerê parastina çand, fikir û mirovahiyê dike û wiha got: “Ji bo gelên bindest azadî û mafên xwe bidest bixin, têdikoşe. Parêzname û pirtûkên Rêber Abdullah Ocalan isbat dikin ku ew fîlozofê serdemê ye.”
Di axaftina xwe de Hacî got ku ku gelek sedemên girtina Ocalan hene û ev tişt anî ziman: “Ji ber wî felsefeya demokratîk a cîhanî belav kir, da ku gelên bindest rizgar bike. Gelên Rojhilata Navîn ji maf û azadiya xwe bê par mane. Gelên Rojhilata Navîn di nava dîrokê de û heta roja îro ji bo azadî û rûmeta xwe têdikoşin. Siyasetên dewletên desthilatdar û kiryarên wan ên li dijî gelan hişt ku gel bê maf bimînin. Lê êdî ev pergal nikarin xwe bidomînin û dê gelên xwedî maf qezenc bikin.”
Diyab Hacî tekez kir ku felsefeya netewa demokratîk û biratiya gelan çareserî, ji dagirkerên Rojhilata Navîn re bersiva herî baş e û axaftina xwe wiha bi dawî kir: “Çareseriya nakokiyan ne di berjewendiya dagirkeran de ye. Rêber Abdullah Ocalan tekane kesê ku dîrok nirxand û çareserî ji bo hemû pirsgirêkan pêşkêş kir. Di vê pêvajoya hesas de ji gelê kurd tê xwestin ku yekitiya xwe ava bikin da ku xizmeta doza xwe bikin û tecrîda li ser Rêber Abdullah Ocalan bişkînin.” QAMIŞLO
