Navenda Nûçeyan |
Kongreya Demokratîk a Gelan (HDK) û Partiya Herêmên Demokratîk (DBP), derbarê 6’emîn salvegera komkujiya li dijî êzidiyan ku di 3’yê Tebaxa 2014’an de bi destê DAIŞ’ê li Şengalê pêk hat, daxuyaniyên nivîskî parve kirin.
HDK’ê di daxuyaniya xwe de tiştên ku dema komkujiyê pêk hatibûn bi bîr xist û diyar kir ku di tevahiya dîrokê de gelê êzidî ji aliyê hêzên dagirker ve hatine pelçiqandin û di komkujiyan re hatine derbaskirin. HDK’ê destnîşan kir ku hewl tê dayîn êzidî ji axa xwe bên koçberkirin û çand û baweriya êzidiyan ji holê bên rakirin û wiha got: “Îro jî êzidî bi talûkeya komkujiyê re rû bi rû ne. Li dijî vê talûkeya li hemberî hebûna êzidiyan divê civaka navneteweyî berpirsyariya dikeve ser milê wê pêk bîne. Em êzidiyên ku ji aliyê DAIŞ’ê ve bi hovane hatin qetilkirin bi rêzdarî bi bîr tînin û bang dikin ku herkes li dijî komkujî û pêkanînên li dijî mirovahiyê têbikoşe.”
DBP’ê jî di daxuyaniya xwe de da zanîn ku dramên êzidiyan îro jî didomin û ev tişt anî ziman: “Hê jî aqûbeta bi hezaran jinên êzidî ku hatin qetilkirin, revandin û li bazarên koleyan hatin firotin nayê zanîn. Tunebûna hewldanên dewletan ên ji bo hînkirina aqûbeta jinên êzidî hêz dide çeteyên cîhadîst. Divê berpirsyarên vê komkujiyê ku weke sûcê li dijî mirovahiyê hatiye qebûlkirin, bên darizandin.”
