Avûkatanê Rayberê Şarê Kurdî Abdullah Ocaşanî ra Îbrahîm Bîlmezî raporê Komîteya Vergirewtişê Îşkenceyî ya Konseya Ewropa (CPT) ANFyî rê ercna.
Bîlmezî îfade kerd ke CPTyî gulana 2019î de Îmrali zîyaret kerd û vat: ”Ma seba raporî zaf vindertî. Ma her reye CPTyî waşt ke wa lez têbigêro. Eke CPT cayêk zîyaret bikero hêverî dewleta nê cayî rê rapor şaweno û pabeyê erj û rexneyanê a dewlete paweno. Heta ke a dewlete destûr nêda CPT raporê xo eşkera nêkeno. O diyîn zî seba ke Tirkîya nê raporî her rey taloq kena wna erey kewena. Tirkîya tim nê metodê CPTyî xebitnena.”
Bîlmezî ard ziwan le seke raporê peyênî de zî ame dîyene, raporanê CPTyî de tesbît, pêşnîyaz û rexneyê girîngî estê û vat: ”Rixmê naye zî 21 serrî yo ke Îmrali de çîyêk nêvurîya. Eqsê ci zêdê heqê merdiman yenê binpaykerdene. Xeylêk babetî estê ke ganî Tirkîya goreyê peyman û pêkerdişanê mîyanneteweyîyan bîyara ca. Tirkîya seba ke nê mesuldarîyan nêara ca her çi kena. CPTyî na rewşe 21 serran ra nata nêdîyaye yan zî pey goş kerda. No zî hêz dano Tirkîya ke bêhuqûqîyanê newîyan bikera.
Rapor de seke ma tim vano yeno îfadekerdene ke tecrîdê Îmraliyî roje bi roje giran beno. Reyna yeno waştene ke keye û avûkatî mengêke de reyêke tepişteyan reyde pêvînayîş bikerê. Nika ma bi meraq pawenê ke hukmat do CPTyî rê se vajo. Dewlete her hewte bi bahaneyan verê pêvînayîşan gêna. CPT zî na raştîye hol zanena. Ma do bivînê ke CPT hînî nê metodî rê çîyêk vano yan nê. Mîsal raporê peyênî de yeno vatene ke cezayê dîsîplînî yê Îmraliyî cezayê bîlasebeb ê.”
Bîlmezî da zanayene ke raporê peyênî yê CPTyî de ame mojnayene ke ganî rejîmê înfazî yê cezaya muebede newe ra bêro ercnayene, bêro vurnayene û vat: ”Na babete de rixmo ke ma hende muracat kerd Tirkîya heta nika gamêke nêeşte. Ganî CPT hînî cidî bibo û Tirkîya warê mîyanneteweyî de teşhîr bikero.
Tecrîdê Îmraliyî pêro Tirkîya eleqedar keno. Ma venga rayaumûmîya demokratîke danê ke babeta tecrîdê Îmraliyî de hîsger biba û nêrazîbîyayîşê xo bimojna.” STENBOL
