Qeyûmê Amedî ferman da ke keyeyê taxa Şehîtlîkî ya Sûrî wa bêrê rijnayene. Nê keyeyî siqaqê 286. binê Sûranê tarîxîyan de yê. Bire 23ê temmuze de hetê Serekîya Daîreya Şehîtlîk û Îmarî ya Şaredarîya Girdî ra ameye girewtene û 11ê tebaxe de zî roniştoxê taxe rê teblîg ame şirawitene.
Roniştoxanê taxe da zanayene ke wezîfedarî ameyî û înan seba rijnayîşî taxe de cigêrayîş kerd. Roniştoxan îfade kerd ke ê nêwazenê keyeyê înan birijîyê. Roniştoxan vera bire nêrazîbîyayîşê xo mojna.
Destpêkê qiseykerdişan de ewil roniştoxanê taxe ra Bedia Duro qisey kerde û wina va: “Ma keyeyanê xo veng nêkenî. Ma rê vanê ganî şima keyeyan veng bikerî, la ma no wextê nêweşîye de şorî kam ça? Ez tîya de tena serê xo cuyena. Eke tîya birijîyo, ez nêzana şêra ça.”
‘Ma do xo bierzî vernîya makînayan’
Duro dewamê qisyekerdişê xo de ard ziwan ke ê bi serrano na taxe de ronişenî û dîyar kerde ke eke taxe birijîyo do pêroyê vîradişê înan zî birijîyî û wina domnaye: “Ez 27 serrî ra nata tîya de cuyena. Bi serran o ma faturayanê cereyan û awe danî. Yanî delîlê cuyayîşê ma ê tîya esto. No nîno înkarkerdene. Ma do xo bierzî vernîya makînayan û destûr nêdî rijnayîşê keyeyanê xo.”
‘Ma nêpawitêne’
Roniştoxan ra Mevlude Demîre qiseykerdişê xo de bale ante prosesê nêweşîye ser o û wina va: “Nizdîyê yew aşmî verê selahîyetdarî ameyî taxe û vatî ke projeyêko newe do bivirazîyo û seba newekerdişê suran ganî tîya birîjîyo. La ma no prosesê pandmî de şorî kam ca.”
‘Dewlet bi zorî ma vete’
Tewr peynî Azîze Erdogane qisey kerde û aye zî va: “Nizdîyê 5 serrî verê 2 keyeyê mi yê kişta Kervansarayî destê mi ra ameyî girewtene. Ma rê vatî ke eke şima tîya ra bivejîyî ma do kîraya şima bidî. La tena yew sere kîraya ma dayî. Hem keyeyê mi girewtî û hem zî kîraya mi nêdanî. Ma rê vatî ke ma 30 hezar TL danî şima. Pê 30 hezar TL kamyonêk tula daxî nîno.”
Azîzeye daye zanayene ke aye prosesê xoverdayîşî de 45 rojan keyeyê xo de menda, la dima ra dewlete bi zorî înan ewja ra veta. Azîzeye dîyar kerde ke dewlete înan rê vata ke do zirarê înan bida, la tewrê keye û eşyayan tena 4 hezar TL dîyayo înan û ard ziwn ke ê zalimî ma bi zorî vetî. AMED
