Roj çina ke Tirkîya de binpaykerdişê heqan nêbo. Bi serran o Tirkîya de heqê hepsîyanê sîyasî yeno binpaykerdene. Selahîyetdarî ne goş danî waştişê hepsîyan û ne zî merdimanê înan. Badê vilabîyayîşê Vîrusê Korona (Covid-19) hetê cuya hepsîyan de şikî zêdîyayî. Xeylê zîndanan de hema zî seba vernîgirewtişê vîrusî tedbîrî nêameyî girewtene. Seba ke no proesê janî de xeylê hepsî ameyî surgunkerdene keye û merdimê hepsîyan nêeşkenî şorî pêvînayîş.
‘Zextêko psîkolojîk yeno rayraberdene’
Nê hepsîyan ra yew zî Mahsun Ceylan o. Mahsun Zîndanê Asayîşo Berz yê Hûmara 2. yê Xarpêtî de tepişte yo. Suna Ceylane 2 serrî yo ke birayê xo Mahsunî nêvînena. Ceylane dîyar kerde ke tena bi rayîrê telefonî pêvînayîş pê ana û rewşa birayê xo ra şikin a û wina va: “Sere de destûr nêdayêne ke hepsî spor bikerî û bêrî têhet sohbet bikerî. Dest ronenî kitab û her çîyê taybet yê hepsîyan. Zîndanê Xarpêtî tu çîyo ke birayê mi Zîndanê Rîze ra berdbî nêgirewt zerre. Zîndan de zextêko psîkolojîk yeno rayraberdene.”
‘Nêverdenî ma cayê yewbînan de ronişî’
Ceylane dewamê qiseykerdişê xo de daye zanayene ke aye 2 serrî yo birayê xo Mahsunî nêvînena û domnaye: “Nika tena ma bi rayîrê telefonî yewbînan reyde qisey kenî. O zî tena 15 ya zî 20 deqe yo. Seba ke birayê mi cezaya muebetî girewto, ma yew bi yewe şonî pêvînayîş û tena 40 deqe eşkenî ci vînenî. Ma 4 kes şonî pêvînayîş, la tena ma yew bi yewe şonî zerre. Serê merdimî keweno 5 deqe. Cayê pêvînayîş zaf xirab o û nêverdenî ma cayê yewbînan de ronişî.”
‘Ma azadî û seyyewbînanî wazenî’
Ceylane tewr peynî daye zanayene ke rewşa ekonomîye vera tena yew serrî de reyêk şonî pêvînayîş û wina va: “Mahsun seba ke bêro Zîndanê Wanî waştişname nuşt, la waştişname ame redkerdene. Ma zî herinda ke pere bidî rayîr, ma ci rê şirawenî. Mesrefê şîyayîş û ameyîşê xeylê giran o. Heqê cereyan û awe zî hepsîyan ra gênî. Her çiqas ke ma zaf meraq bikerî zî ma nêeşkenî şorî. Heto bîn de Qanûnê Înfazî vetî, la hepsîyanê ma nêvetî. Çi destê m ara bêro ma do seba hepsîyanê xo bikerî. Ma azadî û seyyewbînanî wazenî.” WAN
