Fermandarê Qerargehê Merkezê Pawitişê Şarî Murat Karayilanî derheqê serrgêra 36. ya Hamleya 15ê Tebaxe de mesajêk weşana.
Mesajê Murat Karayilanî wina yo:
”Ma koyanê Kurdîstanî ra selam kenê şima pêroyînan, Roşanê şima ya Ganîbîyayîşî fîraz kenê. Ma Roşanê Ganîbîyayîşî yê şarê Kurdîstanî, şarê Rojhelatê Mîyanênî, embazan, sempatîzanan fîraz kenê. Ma serrgêra 37. de her kesî rê serkewtiş wazenê. Ez nameyê pêro embazan ser o roşanê Rayber Apoyî zî fîraz kena. Ma perwerîya xo bi rêzdarî pêşkêşê ci kenê. Ma şexsê Fermandar Egîdî de pêro şehîdanê xo bi hûrmet û minetî yad kenê. Ma soz danê înan ke çeka înan do erd de nêmanê, armancê înan do bêrê caardene, Rayberîya azade û Kurdîstanê azadî do biciwîyê.
11ê tebaxe de hêrişê artêşa tirke yê vera Biradostî de fermandarê ma yo erjîyaye û embazê ma Egîd Garzan (Murat Kalko) şehîd bi. Nê hêrişî de fermandarê Iraqî Zubeyr Halî û Mihemed Reşîd zî şehîd bîyî û di leşkerê artêşa Iraqî birîndar bîyî. Ma keyeyanê fermandaran rê, şarê Iraq û Kurdîstanî rê, selahîyetdaranê Hukmatê Iraqî rê serweşîye wazenê. Hesanê nê hêrişî do bêro persayene. No hêriş rast a rast vera artêşa Iraqî ame kerdene.
Hukmatê Herêma Kurdîstanî vatêne ‘PKK û dewleta tirke şerê xo ard heta zereyê Başûrî, PKK şino sînorî, vera artêşa tirke hêrişan keno û dima remeno Başûr.’ Nê raşt nîyê. Dewleta tirke 3-4 serram ra nata wazena ke Başûr îşxal bikera. Yanî ma no şer nêard tîya. Şer Heftanîn, Xakurkê û Zap de qewimîyeno. Ma bi şerê xo deskewteyan, erdê şarê Başûrî pawenê. Eke artêşa tirke xo Başûrî ra bianca ma pê qayîl ê ke çalakîye zî nêkerê. Eke Heftanîn de 2 mengan ra nat xoverdayîş nêameyêne kerdene nika rewî ra Başûr amebi îşxalkerdene.
Hamleya 15ê Tebaxe Vakurê Kurdîstanî de verê çinkerdişê şarê kurdî girewt. Hamleya 15ê Tebaxe bîye merkezê têkoşînê azadî, demokrasî û cinîya azade. Şorişê Rojawanî zî na hamle reyde formêk girewt. Hamleya 15ê Tebaxe ra nêbiyêne şarê Başûr û Rojhelatê Kurdîstanî nêameyêne xo ser.
Hamleya 15ê Tebaxe reyde 4 parçeyê Kurdîstanî bîyî yew. Seke Rayber Apoyî vatêne ‘Hêverî yewîya neteweyî dima bawerî û dîyalektîkî’ Hamleya 15ê Tebaxe stratejîyêka neteweyîye awan kerde. Na stratejî destê kurdan kerd bihêzêr û DAÎŞ bin kerd. Bi nê hawayî kurdî bîyî aktorê Rojhelatê Mîyanênî.
6 serrî verê cû artêşa tirke ya îşxalkere bi paştdayîşê NATOyî teknolojîya şerî visnaye destî û aye vat qey ê do gerîlayan bi nê teknîkî çin bikerê û heta welatanê verênan ê Osmanijan apey bigêrê. Bi nê hawayî 6 serrî yo ke vera gerîlayan şer kenê, vera Rayber Apoyî tecrîd anê ca, vera şarê kurd û tirkî teda û qirkerdiş kenê.
Netîce na ya: ê ser nêkewtî, bin kewtî. Coka AKP û MHP de kaos esto, krîz bîyo xorinêr. Seba ke vera ma ser nêkewtî înan hêrişê teberê welatî kerd. Dewleta tirke hêrişê Sûrîye, Iraq, Lîbya kena, serê ereban ra hesaban virazena û polîtîkaya zulmî ana ca. Nê rojan de zî Dengizê Sipî de vera yunanan krîzêk viraşt.
Gerîlayanê azadîye heta nika zaf reyî îsbat kerd ke ê do bin nêkewê û ê do tim naye îsbat bikerê, verê serkewtişî abikerê. Gerîlayê Azadîye yê Kurdîstanî wazenê ke bi felsefeya Rayber Apoyî gerîlayêkê/a neweyî/newîye biafernê, gerîkalayanê Modernîteya Demokratîke aver berê.
2 mengan ra nata Heftanîn de xoverdayîş esto. Efsaneyê înan teyarayê çekdarî yê bêmerdiman Heftanîn de çin bîyî. Ma şarê xo ra bi taybetê şarê Başûrê Kurdîstanî, ereban û şarê Iraqî ra wazenê ke paştî bidê ma. Ma qerardar ê ke dişmen bin bikerê. Ma Heftanîn de ê kerdî sey tewşan û eke bêrê Zap ma do înan bivisnê binê erdî. Tecrubeyê ma yê 36 serran esto. Ma zanenê ke ma do ser bikewê. Ma 36 serran ra nata bi hawayêkê eşkerayî naye zanenê. La ganî şarê ma zî mesuldarîya xo bîyaro ca.
Perspektîfê ma perpektîfê Rayber Apoyî yo,perspektîfê şarê şerwanî yo. Mesuldarîya şar, cinî û ciwananê ma esta ke ganî bîyarê ca.
Ma wazenê ke serrgêra 36. ya 15ê Tebaxe de têkoşînê xo geş bikerê. Ewro şarê ma Ewropa de çalakîyan keno, no girîng o. CPTyî zî eşkera kerd ke Îmrali de tecrîd esto. No bingeyê têkoşîn û heqdarîya ma keno zixmêr. Çalakîyê Ewropa tesîrê sîyasî û dîplomatîkî kenê. Ma sey şarî eşkenê ereban reyde bibê yew, şerê xo berz bikerê û bi nê hawayî AKP û MHP çin bikerê.
Serrgêra 37. ya têkoşînê ma do biba pîlêr, modern û hêzê serkewtişî. Ma Egîdê verênî ra heta Egîdê peyênî pêro şehîdanê xo yad kenê, şexsê Mam Zekî, Erdal, Arakan Mahîran de şehîdanê 15ê Tebaxe yad kenê. Nê esasî ser o ma reyna Roşanê Ganîbîyayîşî fîraz kenê û her kesî rê serkewtiş wazenê. Wa biciwîyê Rayber Apo û 15ê Tebaxe.” Çime: ANF
