Nûçegihanê Rojnameya Evrenselê yê Amedê Cengîz Anil Bolukbaş, da zanîn ku 3 kesên xwe weke polîs nîşanî wî dan ji cihê kar girtine, sîxurtî ferzî wî kirin û gef lê xwarin. Nûnertiya Sendîkaya Rojnamegerên Tirkiyeyê (TGS) ya Amedê, derbarê bûyera di 24’ê tebaxê rû da de, daxuyaniyek kurt da û diyar kir ku ew ê têkildarî mijarê sibe saet 12.00’an li avahiya TGS’ê daxuyanî bide çapemeniyê.
TGS’ê di daxuyaniya xwe de wiha got: “Roja 24’ê tebaxê piştî nîvro, 3 kesên xwe weke polîs bi Bolukbaş didin nasandin, wî dixin dikanekê û sîxurtiyê lê ferz dikin. Ev kes gefan li Bolukbaş dixwin û ji wî dixwazin ku ji bo wan muxbiriyê bike. Helwesta van kesan, di şexsê Bolukbaş de, hemû xebatên rojnamegertiyê weke sûc hatiye terorîze kirin.” AMED
