Êlih de testê vîrusê Korona yê 15 hezar kesî pozîtîf vejîyayî û ekîpa fîlyasyonî 40 hezar kesan teqîb kena. Seba ke hûmara nêweşan vera zêdîyena Nêweşxaneyê Dewlete yê Êlihî de ke nêweşxaneyê pandemî yo, ca nêmend.
8ê tebaxe de testê Hazale Açikalin (47) pozîtîf vejîya. La nêweşxaneyê xusûsî ci rê ambulans nêerşawit, ambulansê nêweşxaneyê dewlete zî îfade kerd ke ê têna seba şîyayîşê nêweşxaneyê dewlete xizmet danê. Mêrdeyê Hazale vîdyoyêk girewt û îfade kerd ke eke ambulans înan nêbero nêweşxaneyê xusûsî o do vîdeo pare bikero. Dima Hazale bi ambulansê nêweşxaneyê dewlete wedarîyaye nêweşxaneyê xusûsî.
Hemserekê Sendîkaya Kedkaranê Xizmetê Sosyal û Weşîye (SES) yê Êlihî Denîz Topkanî derheqê mesele de qisey kerd û da zanayene ke se ra 50ê testê vîrusê Korona pozîtîf vejîyenê. Topkanî vat: ”Yeno vatene ke Êlih de 500 kesî merdî. Rewşe hende giran a. Şaristan de 3 hezar û 500 xebatkarê weşîye estê û înan ra 700 kesî pê Korona kewtî. Nêweşxane nêweşan rê qîm nêkeno.
Hewteyê vîyarteyî de zî 7 nêweşê ke dora servîsê ciewnîyayîşê giranî de bîyî merdî. Hemwelatîyî verê nêweşxaneyan de nêrazîbîyayîşê xo anê ziwan. Êlih de merdimî hînî pê sîstemê weşîye bawer nêkenê. Coka wazenê şorê nêweşxaneyanê bînan.” ÊLIH
