Şandeya KCD, HDK, DBP û HDP’ê ya li Mêrsînê hevdîtinên xwe yên di çarçoveya ‘Bernameya Têkoşîna Demokratîk’ didomînin. Şandeya ji Hevseroka KCD’ê Leyla Guven, Hevberdevka HDK’ê Îdîl Ûgûrlû, Hevserokê DBP’ê, parlamentera HDP’ê Huseyîn Kaçmaz pêk hat çûn serdana sendîkayên DÎSK û Turk-Îş’ê.
Hevseroka KCD’ê Leyla Guven di hevdîtina li DÎSK’ê de axivî û destnîşan kir ku Tirkiye yek ji welatên girîngtirîn ê Rojhilata Navîn e û wiha got: “Lê ji ber polîtîkayên şaş û şer niha em dibînin welat di çi rewşê de ye. Tirkiye anîne wê astê ku muhtacî nan e. Dovîz her ku diçe difire. Gundî û karker perîşan in. Kes nikare perîşaniya xwe jî bîne ziman. Her kesê ku tîne ziman jî di bin zextên darazê de ne. Heke em hemû bi hev re tev bigerin û dest bidin destê hev, em ê bikaribin ji bo welat rêveberiyek demokratîk biafirînin.”
Pitşî hevdîtina li DÎSK’ê, şande çû serdana Turk-Îş’ê. Hevserokê Giştî yê DBP’ê Keskîn Bayindir di hevdîtinê de axivî û diyar kir ku li Tirkiyeyê yek ji pirsgirêkek mezin jî pirsgirêka krîza aborî ye û ev tişt anî ziman: “Sedema bingehîn a krîza aborî û civakî ew e ku îktîdar bi polîtîkayên şer û zextan nêzî kêşeya kurd dibe. Vê pirsgirêkê ji nedîtî ve tê. Hemû çavkaniyên welat ji polîtîkaya şer re tê xerckirin. Îktîdar jî siyaseta xwe li ser zemîna şer birêve dibe. Pirsgirêkên di nava civakê de diqewimin her tim li pişt vê perdeye tê veşartin.” MÊRSÎN
