Çawişê pisporî Musa Orhanî Îpek Era 18 serre rê tecawuz kerdbi. Îpek Ere serebûtî ra dima xîret kerd ke xo bikişa û 18ê tebaxe de dinyaya xo bedilnaye. Musa Orhan dima ke amebi destbendkerdene cade amebi veradayene. Rayaumûmîye vera veradayîşê tecawuzker Orhanî nêrazîbîyayîşê xo medyaya komelkîye ser o mojna. 19ê tebaxe de derheqê Orhanî de bira tepiştişî ameye dayene. La tecawuzker Musa Orhan seba ke ‘îhtîmalê ci çin o ke biremo’ 7 rojan ra dima vizêr reyna ame veradayene.
Dadîya Îpek Ere Hakîme Kilinçe vera verdayîşê tecawuzkerî nêrazîbîyayîşê xo mojna û vat: ”Heta ke ez weş ba ez peyê na dewa de ya. Ez do bi çimanê xo bivîne ke o mêrik ceza gêno. Eke edalet bibîyêne tecawuzker nêameyêne veradayene. Ez hînî nêeşkena daymîşa ci biba. Ne dadî ne zî babîyê ê tecawuzkerî ma rê telefon kerd û serweşîye waşte. Ê zî domanê xo pawenê û serebût mîyan kenê. Ez naye qebul nêkena. Îpeke heta ke o mêrik cea bigêro nêmirena. Ez seba ke kênaya mi rehet rabikewa do her çi bikera.
Ez do na dewa ra fek vera nêda. Ez nêeşkena ra bikewa û nanêk biwera. Eke o mêrik bêro hukmkerdene zerrîya mi bena rehet. Ez hînî pê edaletî bawer nêkena. Ez do peyê pawitoxanê ê mêrikî nêverda. Kênaya mi mektubê xo de çi ameyo sereyê ci nuştbi. Ey çeka xo û dewlete ra hêz girewt û wina kerd.
Gereka Suleyman Soyluyî bivatêne ‘Şima do senî ey vera da.’ La hema gonîya Îpeke nêestarite. Ez nêeşkena bedenê parçekerdeyî yê Îpeka xo, xo vîrî ra bikera. Seba ke ti leşker î ti eşkenî cinîyamn rê tecawuz bikerî? Ti pê çita hend bawer î? Kênaya mi tersî ra nêeşkîyaye çîyêk vaja. Ez do na dewa ra fek vera nêda. Ganî pêro Tirkîya naye bizana.” ÊLIH
