Yeno vatene ke doneyê Vîrusê Korona yê ke hetê dewleta tirke ra yenê parekerdene raşt nîyê û hûmara raştikêne ya merg û nêweşan zêdêr a. Wezaretê Weşîye da zanayene ke heta nika 6 hezar û 209 kesî vîrusî ra merdî. La eşkera bi ke têna Amed de goristanê Vîrusê Korona de 540 kesî ameyî definkerdene.
Amed de her roje senî ke waqayî zêdîyenê gorî zî hende zêdîyenê. Goristan de 8 parselî zî bîyî pirr la her roje cenazayê neweyî yenê.
Hemserekê Sendîkaya Kedkaranê Xizmetê Sosyal û Weşîye (SES) yê Amedî Şîyar Guldekînî zî ard ziwan ke Yenikoyê Amedî de zî goristanêk de cenazayî yenê definkerdene û doneyê Wezaretê Weşîye raşt nîyê.
Guldekînî vat: ”Amed de her roje 700-750 nêweşê Korona yenê nêweşxane. Înan ra 150 kesî servîsê ciewnîyayîşê giranî de yê. Nê hîrê rojan de 23 kesî têna Amed de merdî. Vizêrî ra heta ewroyî zî 8 kesî merdî. Dewlete hûmara raştikêne nimnena û doneyan manîpule kena.” AMED
