Meclisa Ciwanan a Rêxistina HDP’ê ya Stenbolê derbarê revandina endamên xwe û lêferzkirina sîxûriyê ya li ser endamên xwe civîna çapemeniyê li dar xistin. Parlamenterê HDP’ê yê Şirnexê Hasan Ozguneş, Hevserokê HDP’a Stenbolê Erdal Avci û ciwan beşdarî civînê bûn.
Hevserokê HDP’a Stenbolê Erdal Avci di civînê de axivî û diyar kir ku dewlet her cûre zextê li ser ciwanan pêk tîne û van sepanên lêferzkirina sîxûriyê û revandinê sepanên salên 1990’î tîne bîra wan û ew ê van sepanan qebûl nekin.
Pişt re parlamenter Hasan Ozguneş axivî û da zanîn ku revandina hevalên wan ciwan metirsiyekî bi xwe re tîne û bang li dewletê û Wezîrê Karên Navxweyî Suleyman Soylû kir ku kî li pişt wan hebe bila derxin holê û got ku wê tu hêz nikaribe pişta siyaseta wan bişkîne û dê bibin şopdarê van bûyeran.
Gefan li wan dixwin
Endamê Meclisa Ciwanan a HDP’ê Mûrat Yaşa anî ziman ku her cûre zext li ser endamên wan didomin û di hefteyeke dawî de 3 endamên wan ji aliyê kesên xwe wek polîsan didin nasîn ve bi darê zorê hatine revandin û sîxûrtiyê li wan ferz kirine.
Yaşa da zanîn ku wan kesên xwe wek polîsan didin nasîn gefa kuştinê li endamên wan dixwin û her wiha gefan li malbatên wan jî dixwin û got ku ew ê li dijî vê polîtîkaya bi destê dewletê li dijî endamên wan pêk tê hin bêtir bixebitin û xwe birêxistin bikin.
Her wiha HDP’yî dê mijarê bibin rojeva meclisê û gilî bikin. STENBOL
