Dewleta tirke ya îşxalkere Herêmanê Pawitişî yê Medya de bi paştdayîşê PDKyî rayberîya Fermandarê Hêzê Paştdayîşî yê Pêşmergeyan ê 1. Sihan Barzanîyî baregehanê neweyan û merkezan virazena.
Nê cayan de ke hetê MÎTî ra weçînîyayî, bi hemkarîya PDKyî merkezê neweyî virazîyenê ke noqtayê gerîlayan bêrê teqîbkerdene, çimeyê fînans û depoyê çeke bizanîyenê.
Baregehê ke dewleta tirke Başûrê Kurdîstanî de viraştî û baregehê neweyî wina yê:
* Xeta Bradost ve Sîdekanî de merkezê neweyî virazîyayî
* Girê Hesen Begî de noqtayê çimdarîye yê neweyî virazîyayî
* Koyê Helgurtdî û dewa Haci Umranî de seba viraştişê noqtaya çimdarîye û qereqolî xebatî yenê kerdene.
* Koyê Hesaarî Serkanî de, rayîrê Mexîmanî de, herêma Dolanî de, Rayat û Berde Zerdê de qereqolê neweyî virazîyayî.
* Gundê Jor, Gundê Jêr ve Şereye de dima ke noqtayê kontrolî virazîyayî derbazê herêma Belêkatî ame kerdene. Dêlzer û Berdeboşkan de zî qereqolê neweyî virazîyayî.
*Girê Helemondî yê Zînî Wertê de û dormeyê qezaya Rewandûzî de leşkerê tirkê ke kincê pêşmergeyan xo rê dayî ameyî cakerdene. Rewandûz de zî dewa Xiwarû rê çekê giranî erşawîyayî.
* Qesre, Bocar, Xaneq, Kolîtar, Mamerût, Pişt Mergê ve Balayan de qereqolan de hûmara pêşmergêyan ameye zêdînayene.
Dîya zanayene ke seba viraştişê qereqolanê neweyan mabênê Tirkîya û PDKyî de komîteyêke ameye awankerdene. Seba nê qereqolan Hukmatê Başûrî fînans dano. Dewleta tirke zî heqê petrolo ke Başûrî ra şino Tirkîya peyda kena.
Goreyê zanayîşanê ke çimeyanê herêmîyan ra gêrîyayî, qereqolê hêzanê PDKyî, bi taybetî qereqolê Biradost, Belekatî û Rewandûzî kontrolê MÎTî de yê. Fermandarê Helgurtî Berhem Arîf Yasîn zanayîşan dano MÎT. Yewinê Antî-Terorî yê Parastini Fermandarîya Sipêlkî û Hêzê Paştdayîşî yê Sihad Barzanîyî zî binê na xebate de yê. Pêşmergeyî, endamê MÎTî û hêzê taybetî yê tirkan tîya de ca bîyî.
Dima ke zanayîşî dîyenê MÎT nê cayan ser o bombayî yenê varnayene.Nê bombardumanan e sivîlî yenê qetilkerdene û bax, baxçeyî zerar vînenê. Têgêrayîşê Azadîye yê Kurdîstanî zî şehîdna dano.
Seba ke verê nawnayîş û protestoyan bêro girewtene zanayîşî Parastin reyde yenê parekerdene, kesê ke rayberîya çalakîyan kenê yenê bêtesîrkerdene. Mîsal ciwanê ke Şeladizê de dewleta tirke protesto kerdêne bi SÎHAyan ameyî qetilkerdene. Her ca de hêzê PDKyî operasyonanê destbendkerdişî kenê. Heta nika aqîbetê destbendkerdeyan eşkera nêbi. Dihok, Zaxo û Hewlêr de zî operasyonî yenê kerdene.
Çapemenîye PDKyî û Parastin seba ke hemkarîya xo ya bi dewleta tirke mîyan bikerê tim PKK sûcdar kenê.
MÎT amadekarîye keno ke bi hemkarîya PDK û Cepheyê Tirkmenan Kerkûk îşxal bikero.Cepheyê Tirkmenan zî seba naye xevat keno. Dewleta tirke û pêşmergeyî seba îşxalî Kerkûk de do baregehêkê hemparî abikerê. Rêxistina Îstîxbaratî ya Iraqî derheqê teqayîşê qezaya Musella ya Kerkûkî de di kesî tepiştbî û eşkera kerdbi ke nê di kesî zî endamê MÎTî yê. Çime/ANF
