Fadîme Çetînkaya dewa Sorekî ya qezaya Mazgêrdî ya Dêrsimî de ciwîyena. Fadîme Çetînkeya serra 2016î de wexto ke hemşaredara Pêrî bîye herinda ci de qeyûm ame tayînkerdene. Di rojan ra dima zî ameye tepiştene û bi şertê kontrolê îmza vera dîyaye.
Lajê Fadîme Çetînkaya û gerîlayê HPGyî Baran Çetînkaya (Brûsk Dêrsim) 4ê êlula 2015î de Dêrsim de şerê vera qereqolî de bi giranî birîndar bibi û 6ê êlule de zî şehîd bi. Şehadetê Brûskî ra serrêke dima leşkeran gorê ci texrîb kerd, kerraya gorî tira vete. Fadîme da zanayene ke pêro keyeyî vera nê hêrişî vindertî û înan kerra leşkeran ra apey girewte.
Nê hêrişî ra dima Fadîme ameye hedefkerdene û leşkeran reyna eşt keyeyê ci ser. Fadîme vat: ”Nezaret de înan mi ra persa ke mi şîîra serê gorê lajê mi nuşta yan nê. A şîîre mi rê vîrameyîşê lajê mi bi. Mi şîîra ci serê kerra de daye nuştene. La înan kerra şikite û berde. Leşkeran vat tede çekuyê qedexeyî yê sey kurd û Kurdîstanî estê. Mi rê dewa akerde. Dima mi rê vat ‘nameyê lajê to Baran o, çira serê gorî de Brûsk nuseno?’ û wina pêser mi rê dewayî ameyî akerdene.”
Şerê vera qereqolî de sivîla bi nameyê Aytene Gulhan pê guleyê sekbanî merde. Keyeyê Aytene dewlete rê dewa akerde û ser kewte. La Dewlete pereyê dewa Fadîme Çetînkaya û keyeyanê gerîlayan ra waşt. Fadîme vat: ”Ma o pere nêda. Dewlete çira ma rê cezaya pereyan dana? Eke ma ê pereyî bidê a zî lajê mi apey dana mi? Dewlete canê mi, mi ra girewt. Ez pereyê çita bida ci? Ma rixmê teda û zulman sereyê xo nêard war û ma do nêarê. Dewlete ma rê, goranê ma rê zulm kena. Dormeyê ma bi kalekol û qereqolan girewte yo.”
Fadîme îfade kerd de Dêrsim de vera bawerî û xoza zî hêrişî estê û vat: ”Xozaya ma texrîb kenê, daristanê ma vêşnenê, îbadetxaneyanê ma rijnenê. Tîya wareyê ma yo. Ma do erdê xo nêteriknê.”
Derheqê Fadîme Çetînkaya de bi îdîayanê ‘endamîya rêxistine’ û ‘propagandaya rêxistine’ 8 dewayî estê. Dosyayê nê dewayan ameyî komkerdene. Roniştişê qerarî yê dewaya Fadîme 9ê teşrîna verêne de Dêrsim de do bêro kerdene. DÊRSIM
