Xwendekara Zanîngeha Munzurê Gulistan Dokû 247 roj e nayê dîtin. Lêgerîna li Dokû ya di nava avê de jî di 6’ê tîrmehê de hat rawestandin. Ligel daxwaza malbatê û ya hevalên wê li cihê bejahî ji bo Gulistanê tu lêgerîn nehate destpêkirin. Her wiha li gel ku hemû delîl ji windabûna Gulistanê Zaînal Abakarov nîşan didin derbarê wî de tu lêpirsîn nehat destpêkirin.
Dayika Gulistan Bedriye Dokû û xwika wê wê Aygul Dokû, li dijî rawestandina lêgerîna Gulistanê, bi daxwaza dîtina wê li Qada Seyît Riza ya li Dêrsimê dest bi çalakiya rûniştinê kirin.
Dayika Dokû diyar kir ku ew 247 roj e ji keça xwe agahiyê nagire û wiha got: “Ez dayik im. Min keça xwe di serî de emanetî xwedê û piştre jî emanetî dewletê kir. Keça min xwendekar e. Gulistana min li ku ye? Hestiyên keça min bidin min. Ger ku mirî be jî hestiyên wê bidin min. Keça min li ku ye? Kîjan dayik dixwaze hestiyan bigire? Ez dayik im, xwe bikin şûna min. Êdî keça min bibînin. Kezeba min dişewite.” DÊRSIM
