Vizêr dadî û waya Gulîstan Dokuye, Bedrîye û Aygul Dokuye wexto ke Meydanê Seyîd Rizayî de çalakîya roniştişî kerdêne ameyî destbendkerdene. Polîsan wextê destbendkerdişî de dadî û wake derb kerdî, paskilî eştî înan.
Platformê Cinîyan ê Dêrsimî zî heman cayî de derheqê mesele de eşkerayîya çapemenîye kerde. Platformî pare kerd ke dewlete bi vatişê xokiştişî xîret kerd ke serebûtê Gulîstan Dokuye mîyan bikera la eşkera bi ke Gulîstane awe de çin a, xo nêkişta. Cinîyan persa ke çira dewlete Zaynal Abarakov û babîyê ci yê polîsî pawena.
Eşkerayîye wina dewam kena: ”Hukmkerdiş û asayîş ê ke Zaynal Abarakov pawenê paskilan erzenê dadî û waka Gulîstan Dokuye. Ma nê kerdişan şermezar kenê. Ma do tira fek nêverdê û tim aqîbetê Gulîstan Dokuye bipersê. Waştişê keyeyê Gulîstan Dokuye waştişê pêro cinîyan ê. Wa Aygul û Bedrîye Doku bêrê veradayene!
Wa îfadeyê Zaynal û babîyê ci bêro girewtene. Waştişê pêvînayîşê bi serekkomarî yê Bedrîye wa bêro caardene!”
Hetê bînî ra vizêr şan dadî Bedrîye û wake Aygul Dokuye ameyî veradayene. DÊRSIM
