Rojnameger Oktay Candemîr li ser hesabê medya civakî henekê xwe bi rêzefîlma ‘Dîrîlîş Ertûgrûl’ ku di TRT’ê de tê weşandin kiribû bi îdiaya ‘heqaret li bîranîna kes kiriye’ li ser fermana Serdozgeriya Komarê ya Wanê hatibû binçavkirin. Candemîr piştî rojekê bi şertê kontrola edlî hat berdan. Candemîr têkildarî muameleya derbarê xwe de axivî û diyar kir ku daraz û emniyet dixwaze bi van binçavkirin û lêpirsînan rojnamegeran bitirsînin lê tevî hemû zextên li ser xwe jî dê di rêya heqîqetê de bimeşe û rojnamegertiyê bike.
Candemîr got ku polîsan dest daniye ser arşîv, kompîtor û CD’iyên wî û ev lêpirsîn ji ber henekê xwe bi rêzefîlmê kiriye hatiye binçavkirin.
Her wiha Candemîr anî ziman ku ew li qereqola polîsan di nezaretxaneyek qirêjî de maye û ev yek jî rê li ber nexweşiyê vedike û da zanîn ku demek dirêj e li Wanê zext li ser rojnamegeran tê kirin û xwest demildest dawî li van zextên ser rojnamegeran were. WAN
