Wendekara Unîversîteya Munzurî Gulîstan Dokuye 250 rojan ra nata vînbîyaye ya. Endamê Platformê Cinîyan ê Mersînî seba Gulîstan Dokuye Meydanê Haştîye yê Ozgecane Aslan de ameyî pêser. Cinîyan pankartî akerdî sloganê sey ‘Edaletê camêrdan nê edaleto raştikên’, ‘Camêrdî kişenê, dewlete pawena’ vatî.
Ayşegule Goçmen çalakîye de qisey kerd û îfade kerd ke Zaynal Abarakov hema zî nêame hukmkerdene. Ayşegule vat: ”Nê welatî de cinîyî her roje seba ke vanê ‘ney’ kişîyenê û dewlete zî kiştoxan pawena. Gulîstane têna bi têkoşînê cinîyan yena dîyene. Heta ke Gulîstane bêra dîyene ma do aqîbetê ci pers bikerê.”
Ayşegule bale ante ser ke dadî û waka Gulîstane seba ke Meydanê Seyîd Rizayî de çalakîya roniştişî kerdêne ameyî derbkerdene û destbendkerdene. Ayşegule vat: ”Ma do pîya bipersê; Gulîstane kotî der a? Se bî Gulîstane? Kam/e kiştoxan paweno/a? Camêrdê sûcdarî bi hawayêkê azadî gêrenê la êyê ke vanê ‘Gulîstane kotî der a?’ yenê derbkerdene, destbendkerdene. Şima kam û çira pawenê?”
Eşkerayîye ra dima çalakîya roniştişî ameye kerdene. MERSÎN
