Têgêrayîşê Cnîyan ê Azadan (TJA) bi kombîyayîşê çapemenîye bi şîarê ‘Ma xo pawenê’ kampanyaya 4 mengan daye destpêkerdene. Kombîyayîş Salona Konferansî ya Vedat Aydinî ya bînaya Partîya Demokratîke ya Şaran (HDP) ya Amedî de ame kerdene.
Aktîvîstê Tevgerê Cinîyanê Azadan (TJA) Amed, êlih, Sêrt, Riha, Çewlîg, Şirnex û şaristananê bînan ê Kurdîstanî ra tewrê kombîyayîşî bîyî. Hetê bînî ra îdarekarê HDP û BDPyî, hemsereka Partîya Herêmê Demokratîkî (DBP) Salîha Aydenîz, Hemsereka Kongreya Komela Demokratîke (KCD) Leyla Guven, wekîlê HDPyî û xeylêk cinîyî zî tewrê kombîyayîşî bîyî.
Eşkerayîya TJA hetê Ayşe Gokkan ra ameye wendene, wina ya:
”Ma sey TJA bi ruhê têkoşêrî yê cinîyan, bi hîsê azadîye ma selam kenê pêro cinîyan. Cinîyê kurdî heta ewro bi xopawitişê vera qirkerdiş, tecawuz û asîmîlasyonî ameyî. Ma Tirkîya û Kurdîstan de vera serdestîya sîstemê camêrdan ziwanê dayîke, erd û awa xo pawenê. Hînî bes o! Ma vera AKP-MHPyî bi şîarê xopawitişî vejîyenê werte. Ma do vera zulmî sereyê xo nêarê war û seba cuya têdûşte xo ver bidê.
Ma do pîya heqê tradîsyonê tecawuzî ra bêrê, ma pîya komelê demokratîkî awan bikerê. Ma Sûr de Nisêbîn de kewtî mewzîyan, çeperê morî viraştî. Ma vera tecrîdî şer kerd. Ma bi kampanyayêke vanê Gulîstane Doku kotî der a û hesab persenê. Ma vera ahîşmendîya ke hêrişê goran kena şer kenê.
Ma do vera serdestîya camêrdan û dewlete îtaat nêkerê. Ma do vera tacîz û tecawuzan xo pawenê. Ewro Kurdîstan de leşkerê sey Musa Orhan cinîyan remnenê, ci rê tecawuz kenê. Dêrsim de Gulîstane Doku hema zî vînbîyaye ya. Coka ma xo pawenê.”
Xerîtaya kampanya ya TJA wina ya:
”-Ma do vera şîdetê dewlet, hukmat û camêrdî têkoşînê bêmabênî bikerê. Bêcezaverdayîş sûc o, hemkarîya sûcî ya. Ma do çok nêşorê erdî.
-Vera tacîz, îşkence û tecawuzê ke polîtîkaya şerê taybetî yê, kolekerdiş, ajankerdiş û kundoxî ma do xo bipawê.
-Ma do vera tecrîdê Îmraliyî azadîye bipawê. Tecrîd sûcê merdimîye yo.
-Ma do vera hêrişkerî û lîncanê AKP-MHPyî ziwanê xo yê dayîke bipawê.
-Ma do Peymana Stenbolî bipawê.
-Ma do yewîya neteweyîye ya kurdan bipawê.
-Vera texrîbkerdişê dewlete ma do xoza bipawê û ekonomîyê komunalî awan bikerê.
Ma venga pêro cinîyanê Kurdîstanî, bawerîyanê Kurdîstanî û dînamîkanê Tirkîya danê ke têdûştî, azadî û yewîya şaran bipawê, bêrê wayîrê kampanyaya ma vejîyê.” AMED
