Komeleya Di Pergala Cezayê Înfazê ya Civaka Sîvîl De (CÎSST) rapora gilî û gazinên girtiyan ên di navbera 1-15’ê îlonê de ji girtîgehan hatine raporek amade kir û rapora ku têkildarî binpêkirina mafan ên 112 girtîgehên cuda ne aşkera kir. Rapor balê dikişîne ser pirsgirêk û binpêkirina mafan ên li girtîgehan. Di raporê de hat diyarkirin ku li girtîgehan kapasîte tije ye, li qawişên qerebalix nivîn nêzî hev in û nahêlin girtî li qadên hevpar û xwaringehan werin cem hev.
Di raporê de hat gotin ku li gelek girtîgehan şertên paqijiyê tên piştguhkirin û li girtîgehan kêm dezenfekte tên kirin û dema girtî diçin hevdîtina telefonê maskeyan nadin wan û kelûpelên paqijiyê bêpere nayên dayîn. Di raporê de her wiha tê destnîşankirin ku bi awayekî têrkirî destûr nayê dayîn û ji ber şibakeyên qawişan biçûk in û bêhna qawişan nayê stendin û li lavaboyan kelûpelên paqijiyê nîn in û gelek caran av tê birîn.
Pirsgirêka ragihandinê
Di raporê de hat diyarkirin ku mafê agahîstendinê yên girtiyan tên astengkirin û pêdiviyê hin girtiyên li girtîgehên cuda yên rojname, radyo, televîsyon û pirtûkan nayê temînkirin û radyoyên girtiyan ên heyî jî tên desteserkirin.
Pirsgirêka xwarinê
Di raporê de kêşeyên têkildarî xwarinê jî wiha hatin rêzkirin: “Li hin girtîgehan xwarina bêqalîte û kêm didin girtiyan. Xwarin paqij nîne. Nanên biçûk didin girtiyan. Xwarin têra girtiyan nake. Ji ber xwarin kêm û nepaqij e girtî neçar dimînin ji kantînan pêdiviyên xwe temîn bikin. Tiştên ji kantînan dikirin jî biha ne û cureyên van tiştan hindik in. Xwarina diyetê nayê dayîn û dema xwarinê didin jî nexweşînên girtiyan tên piştguhkirin. Xwarina nepaqij, kêm jî dibe sedama nexweşînan.”
Di dawiya raporê de derbarê binpêkirina mafan û serlêdanan de gelek xal hatin rêzkirin. STENBOL
