Li navçeya Şaxê ya Wanê di 11’ê îlonê de leşkeran welatiyê bi navê Servet Tûrgût û Osman Şîban binçav kiribû. Piştî du rojan li nexweşxaneya Wanê derketibûn holê ku hatine binçavkirin. Di rapora nexweşxaneyê de hatibû destnîşankirin ku her du welatî ji helîkoptêrê hatine avêtin û îşkence li wan hatiye kirin. Osman Şîban beriya du rojan ji nexweşxaneyê hatibû derxistin û li malê bû. Polîsan vê sibehê bi ser malê de girt û li ser daxwaza Serdozgeriya Wanê Şîban birin nexweşxaneya leşkerî. Nayê zanîn derbarê Şîban de biryara binçavkirinê heye yan na.
Şîban ji ber îşkenceya lê hatiye kirin hişê wî ne li serê wî bû û heta niha derbarê bûyerê de îfadeyên wî nehatiye girtin. WAN
