Serdozgerîya Komare ya Anqara derheqê çalakîyanê Kobanê yê 5-9ê teşrîna verêna 2014î de 7 bajaran de derheqê 82 kesan de qerarê destbendkerdişî da. Çarçewa operasyonê qirkerdişê sîyasîyî de hemşaredar û wekîlê verênî yê Partîya Demokratîke ya Şaran (HDP) zî tede xeylêk kesî ameybî destbendkerdene. Derheqê babete de Nesrîn Nas, Gençay Gursoy û Orhan Alkaya yê ke ANFyî rê derheqê operasyonê qirkerdişê sîyasîyî yê vera HDPyî de roşnvîr û hunermendan qisey kerdî û bale antî muhîmîya têkoşînê hemparî ser.
Prof. Dr. Gençay Gursoy: ”Heta nika nêrazîbîayîşo ke partîyanê sîyasîyan ê muxalefetî dayo qîym nêkeno. Têna HDPyî rê telefon akediş û tewrê çalakîyanê înan bîyayîş nêvejeno. La hetê bînî ra çi heyf ke seba ke ma zanê heta ewro înan çîyêk nêkerdo, ma naye rê zî razî benê. Ganî muxalefet pêro pîya derheqê hêrişê vera HDPyî de tewiro komkerde bido. Cigêrayoxêkî eşkera kerd ke hedef de Kemal Kiliçdaroglu û Meral Akşenere estê. Wina yew rewşe de ma ya vera zextî teslîm benê, ya zî xover danê. Muhatabê naye zî rêxistinê komelê sîvîlî û partîyê sîyasî yê. Rêxistinê komelê sîvîlî xora rolê xo kay kenê la partîyê sîyasîyî hema vindartişo ke yeno pawitene ranêmojnayo.”
‘Rojê tarî Tirkîya pawenê’
Hemsereka verên a Partîya Anavatan Nesrîne Nas: ”Xeylêk wexto ke Tirkîya de huqûq yeno binpaykerdene. Operasyon xora vera HDPyî yo la mesaj dîyeno heme muxalefetî ke hetê demokrasî û huqûqî de yo. Îqtîdar wazeno ke heme dezgeh û awanîyan ê ke seba ci tehdîtê werte a wedaro. Ganî heme hetê ke xo rê vanê demokrat û muxalefet bêşert vera hêrişan paştî bidê HDPyî. Çunku hînî têna HDP nîyo, rojê tarî Tirkîya pawenê.”
‘Çîyê ke aqil nêgeno yew bi yew heta digarg yenê ciwîyayene’
Hunermend Orhan Alkaya: ”Tirkîya de çîyê ke aqil nêgeno yew bi yew heta digarg yenê ciwîyayene. Pê krimînalîzekerdişê HDPyî wazenê muxalefetî bînî bitesnê. Vera nê qewimîyayîşan ganî muxalefetê Tirkîya semedê haştîya komelkî û demokrasîyî îtafaq bikero. Ganî hinî vatişê to wina kerdbi, bierzîyê yew per û têkoşîno hempar bêro dayene.”
