Rojnameya Dîe Weltê ji Rapora Pêşketinê ya endamtiyê ya Komîsyona Yekitiya Ewropayê (YE) ku dane ber Parlamentoya Ewropayê hin beş parve kirin. Li gorî vê tê gotin Tirkiye her ku diçe ji rêya endamtiyê dûr dikeve.
Li gorî raporê şansê Tirkiyeyê ya ji bo endamtiya YE’yê her roja ku diçe kêmtir dibe. Enqere li dijî gendeliyê tu gav neavêtiye, derheqê aboriyê fikarên giran hene. Her wiha tê diyarkirin ku li Tirkiyeyê bi rejîma Erdogan re ‘rêgeza cihêbûna hêzan’ ne çalak e.
Di raporê de tê diyarkirin ku Tirkiye li ser mijarên sereke ku di mûzakereyên endamtiya YE’yê de derketine pêş tiştek nekiriye û wiha hatiye gotin: “Tirkiye her ku diçe bêhtir ji Yekitiya Ewropayê dûr dikeve, li ser mijarên demokrasî, dewleta hiqûqê, mafên sereke û serxwebûna darazê bi paş ve diçe”
Her wiha li ser tevgera Tirkiyeyê ya li deryaya Spî ‘îllegal’ tê gotin û li ser daxuyaniyan jî ‘bi provakatorî’ tê gotin.
Di raporê de her wiha tê diyarkirin rewşa mafê mirovan nexasim ji 15’ê tîrmeha 2016’an û vir ve gelekî kambax bûye. BRÛKSEL
