Endama Koordînasyonê KJKyî Besê Erzîncan derheqê Komploya 9ê Teşrîna Verêne, Hemleyanê KCK û KJKyî û 10ê Teşrîna Verêne Roj Azadîya Ocalanî ya Dinya de ANFyî rê qisey kerd. Qiseykerdişê Besê Erzîncan ra beşêk wina yo: ”Komployê 9ê Teşrîna Verêne komployo tewr hîra yê serdestîya camêrdan ê vera cinîyan o. Komployî hêverî xîretê seba aafernayîşê azadîye yê cinîyan kerd hedef.
Rayber Apo şerwanêko raştikên o. Ey maskeyê hegemonîkan yew bi yew eşkera kerdî, zûrê înan vetî werte, vera înan têkoşîn kerd û nameyê xo tarîxî ser o nuşt. Tarîx de hêverî rayberêkê şarî azadîya merdimîye girê da azadîya cinîyan. Rayber Apoyî azadkerdişê cinîyan sey şorişê mîyanê şorişî pênase kerd. Rayberê ma qet qebul nêkerd ke cinîyî bibê kole, mulkê dewlet û camêrdan.
Komployo Mîyanneteweyî heman wextî de vera têkoşînê azadîye yê cinîyan ame kerdene. Êyê ke 22 serran ra nata tewr zaf vera komplo xo ver danê û wayîrê Rayberîye vejîyenê, cinî yê. Komplo rayberîya cinîyan de bingeyê fedayîtîye ser o bi rêxistinîya xo, bi xoverdayîşê xo ame pûçkerdene. Vera dewleta tirke ya ke dişmenîya cinîyan kena têkoşîn û xoverdayîşê ma hema zî dewam kenê. Cinîyê kurdî bi şîarê ‘Azadîya Rayberê ma azadîya ma ya’ têkoşînê xo ya vera komployî tim bîyarê ca.
Hemleya ‘Tecrîd, Faşîzm, Îşxalî rê Bes o, Wext Wextê Azadîye yo’ ya KCKyî û Hemleya ‘Vera Qirkerdişê Cinîyan Wext Wextê Pawitişê cinîyan ê azadan û komel o’ ya KJKyî do pîya bi hawayêkê parelelî bêrê caardene. Hêzê tewr dînamîkî yê nê prosesî, hêzê ke tewr zaf wayîrê nê hemleyan vejîyenê, cinî yê.
Rojdem û armanco tewr girîng ê nê hemleyan qedînayîşê tecrîd û îşkenceyê vera Rayber Apoyî yo û azadkerdişê ey o.
Dişmenîya dewleta tirke ya vera cinîyan vurîyaye stratejîya taybete. Caardişê Hemleya KJKyî seba karanê cinîyan girîng o. Ganî sere de rêxistinê ma yê cinîyan pêro rêxistinî wayîrê Hemleya KJKyî vejîyê. Ma do hêzê xoverdayîşî yê cinîyan xurtêr bikerê û xoverdayîş pîlêr bikerê.
10ê Teşrîna Verêne Roja Azadîya Ocalanî ya Dinya hetê Înîsîyatîfê ‘Seba Ocalanî Azadîye’ ra asta mîyanneteweyîye de ame îlankerdene. No vengdayîşêko raştikên û manadar o. Cinîyê kurdî prosesê afernayîşê şorişê cinîyan de yê. Qerardarîya seba azadîya Rayberîya mi bi kelecanî hetê cinîyan ra yena qebulkerdene.
Ez venga pêro cinîyan dana ke 10ê Teşrîna Verêne Roja Azadîya Ocalanî ya Dinya de bi xurtî çalakîyan bibê. Ma yewîye û têkoşînê azadîya cinîyan pîya bikerê. Cinîyê ke wazenê azad bibê hînî ganî na game hol fam bikerê. Azadîya Rayberê ma azadîya pêro cinîyan a. Nê esasî ser o ma venga pêro merdimîye danê ke bi xurtî tewrê çalakîyanê seba azadîya Rayberê ma bibê.” BEHDÎNAN
