Wendekara Unîversîteya Munzurî Gulîstane Doku 5ê çeleyê 2020î ra nara vînbîyaye ya. Tehqîqatê serebûtî ra heta ewro netîceyêke nêvejîyaye.
Hetê bînî ra Waka Gulîstane Doku Aygule Doku twitterî ser o eşkera kerd ke Hetkarê Verênî yê Walîyê Verênî û Mudirê Kizilayî yê Dêrsimî Ferhat Hanedan Guvenî û Mudirê ÎŞKURî Ozdemîr Aktaşî seba ke çapemenîye rê qisey nêkero keyeyê Gulîstane rê gef wend.
Wake Aygule Doku vat: ”Nê kesî çira nêwazenê ma aqîbetê Gulîstane nêpersê. Çi eleqeyê înan pa Gulîstane esto? Gelo înan tecawuzê Gulîstane kerd? Nê kesan mi rê vat ke Walîyê verênî yê Dêrsimî ê erşawitî. Destê mi de qeydê vengê înan esto, şahîdê mi zî estê. Nê kesî sûcdar ê. Eke wina nêbo çira tersenê û wazenê na mesele mîyan bikerê?”
Wake Aygule ard ziwan ke ganî walîyo verên mesele eşkera bikero û vat: ”Ya walîyî ê erşawitî yan zî barê nê wird kesan vînbîyayîşê Gulîstane de esto.”
Aygul Doku da zanayene ke ê musayî ke dadîya Ferhat Hanedan Guvenî Keyeyê Mamostayan de ke ê tede mendêne karker a û vat: ”Çira Ferhat Hanedan Guvenî na raştîye nêvate? Dadîya ci tim ameyêne ma hetî û xîret kerdêne ke ma ra çîyêk bimusa.”
Aygul Doku îfade kerd ke senî Guven sey mudirê Kizilayî ame wezîfedarkerdene û wina nêrazîbîyayîşê xo mojna: ”Senî merdimê ke xîret kenê nê serebûtî mîyan bikerê Kizilay de xebitîyeno? Ma 281 rojan ra nata bi hewaran gêrênê kênaya xo.” DÊRSIM
