Dêrsim de tek hostaya cinîye ya viraştişê tembûran Senem Arine (24) bi nê tembûran veng dana darane. Seneme heman wextî de tembûran tamîr kena. Seneme wexto ke newe dest pê nê karî kerdbi xeylê kesan tira vatî ke dima do acîz biba. La Seneme goş pa nêkewte û bi înadî tembûran de eleqedar bîye.
Seneme wexto ke lîse de wendêne cinitişê tembûrî musa. Serra 2014î de Seneme Konservatuarê Semsûrî de binê tesîrê hostayêkê tembûrî de mende û Unîversîteya Ege de viraştiş û tamîrê hacetanê muzîkî ser o perwerde girewte. Seneme dima ke mezun bîye merkezê Dêrsimî de kargehê xo akerde.
Seneme derheqê nê eşqê xo de nê çîyan vate: ”Ma bi vengê tembûran cem gênê, deyîran vanê û keyeyê ma de tim mîyanê xoşeberan de tembûr esto. Ez nika di mengan de yew tembûr virazena. Sere de cinîyî, ez wazena nê karî bimusna her kesî. No kar têna karê camêrdan nîyo. Wexto ke Dêrsim de merdimî mi vînenê şaş benê la ê do bimusê mi. Êyê ke wazenê nê karî bimusê berê mi înan rê tim akerde yo.” DÊRSIM
