Komeleya Mafê Mirovan (ÎHD) a Îzmîrê rapora binpêkirinên mafan a mehên gulan, hezîran, tîrmeh û tebaxê ya bajarên Herêma Egeyê bi raya giştî re parve kir. Binpêkirinên mafan ên li bajarên Îzmîr, Aydin, Denîzlî, Manîsa, Ûşak, Afyon, Kutahya, Antalya, Bûrdûr, Mûgla, Balikesîr û Ispartayê di raporê de cih digirin. ÎHD’ê ji bo aşkerakirina raporê li avahiya xwe civîna çapemeniyê li dar xist û Serokê ÎHD’ê parêzer Zafer Încîn raporê aşkera kir.
Încîn diyar kir ku wan raporê ji agahiyên çapemeniya herêmî û netewî, serlêdanên ji bo komeleya wan, nameyên girtiyan ji girtîgehan şandine, serlêdanên malbatên girtiyan bo wan hatine kirin raporê amade kirine û anî ziman ku li Herêma Egeyê bi giştî 187 binpêkirina maf a binçavkirinê qewimîne.
Încî da zanîn ku li herêma wan bi giştî 197 binpêkirinên mafan ên tundiya li ser jinan qewimîne û 62 zarok jî bi bin pêkirina mafan re rûbirû mane.
Încîn bal kişand ser rewşa penaberan û got li Herêma Egeyê di nava wan çar mehan de 3 hezar û 414 binpêkirina mafê penaberan qewimiye û ragihand ku li qada jîngeha kedê jî 263 binpêkirinên mafan pêk hatine.
Li girtîgehan rewş xerab e
Încîn destnîşan kir ku li girtîgehên li Herêma Egeyê her ku diçe rewşa girtiyan nebaş dibe û her cûre mafên wan tên binpêkirin û di nava wan çar mehan de li girtîgehên Herêma Egeyê 158 binpêkirinên mafan rû dane.
Her wiha Încîn bal kişand ser binpêkirina mafê hawîrdorê jî û got ku li gelek deverên herêmê xweza tê talankirin û destnîşan kir ku di meha gulanê, hezîranê, tîrmehê û tebaxê de li Herêma Egeyê bi giştî 4 hezar û 536 binpêkirinên mafan qewimîne. ÎZMÎR
