Merkezê Xeberan]
28ê teşrîna peyêne ya 2015î de wextê ‘qedexeyê tebervejîyayîşî’ yê dewlete de qezaya Sûrî ya Amedî de verê Mînareyê Çarlingî de Serekê Baroyê Amedî Tahîr Elçî amebi qirkerdene. Dewaya Tahîr Elçîyî de 3ê ci polîsî 4 vergumanî yenê hukmkerdene. Roniştişê verênî yê dewa Mehkemeya Cezaya Girane ya 10. ya Amedî de dest pêkerd. Tena çapemenîya hetgir girîya zerre.
Derheqê polîsanê vergumanan F.T., S.T. ile M.S.yî de ‘qestî ra kiştişî’ ra 3 serran ra heta 9 serran cezaya zîndanî yena waştene. Derheqê vergumanê fîrarî Ugur Yakişirî de zî cezaya muebede yena waştene. Roniştişî ra verî verê edlîya hetê polîsan ra gêrîya binê ablûqa. Salona roniştişî, korîdor û zereyê edlîye de zî bi seyan polîsî kom bîyî.
Keyeyê Elçîyî reyde wekîlê HDPyî Hîşyar Ozsoy, Necdet Îpekyuz, Dersime Dag, Mehmet Ruştu Tîryakî; Wekîlê CHPyî Sezgîn Tanrikulu, wekîlo xoser Ahmet Şik, Endama Delegasyonê Tirkîya yê Yewîya Ewropa Sema Kiliçer, serekê baroyanê Amed, Îstanbul, Îzmîr, Mêrdîn, Gumgum, Colemêrg, Adana, Êlih, Riha, Sêrt û Şirnexî û xeylêk pawitoxê heqanê merdiman ameyî edlîye.
La heyetê mehkeme reyde têna 88 kesî eşkîyayî dekewê salona roniştişî. Yeno pawitene ke verguman û avûkatê înan bi rayîrê SEGBÎSî tewrê mehkeme bibê. Hetê Tahîr Elçîyî ra zî avûkatê ci, cinîya ci Turkane Elçî tewrê mehekeme bîyî. Roniştişî ra verî Serekê Baroyê Amedî Cîhan Aydinî seba ke 64 avûkatî zî tewrê mehkeme bibê lîste daye. Balkêş o ke salona roniştişî de 20 polîsê hêzan ê taybetan estbî.
Hetê bînî ra roniştişî ra verî rojnamegeran ra zî lîsteya nameyan ameye waştene. Heyetê mehkeme destûr da ke têna medyaya îqtîdarî roniştiş teqîb bikera. Serekanê baroyan ê ke na bire qebul nêkerde heyetê mehkeme reyde pêvînayîş kerd. La heyetê mehkeme îtîrazê serekan red kerd.
