Parlamenterê CHP’ê yê Stenbolê û Cîgirê Serokê Komîsyona Lêpirsîna Mafê Mirovan a Meclisê Sezgîn Tanrikûlû ‘Rapora Binpêkirina Azadiya Ramanê û Îfadeyê ya Çile-Îlon 2020’an’ aşkera kir. Di raporê de hat gotin di Endeksa Azadiya Çapemeniyê ya 2020’an a Rêxistina Rojnamegerên Sînor Nenas de Tirkiye di nava 180 welatên cîhanê de bi puana 50,02 di rêza 154’emîn de cih digire.
Di raporê de hat diyarkirin ku tenê di mehên adar û nîsanê de 402 kes hatine binçavkirin û li gorî daneyên Sendîkaya Rojnamegerên Tirkiyeyê (TGS) 74, li gorî daneyên Komeleya Rojnamegerên Hemdem 124, li gorî daneyên Platforma Rojnamevaniyê ya Serbixwe de 89 rojnameger hêj di girtîgehê de ne. Di raporê de hat destnîşankirin ku di 9 mehên sala 2020’an de 29 rojnameger hatine girtin, 65 rojnameger hatine binçavkirin û 20 rojnameger jî bi êrîşan re rûbirû mane. ENQERE
