Cenazeyê gerîlayê HPG’ê ku 21’ê Adara 2017’an li bejahiya Bedlîsê di şer de şehîd bûbû, piştî ku mînakên DNA’yê yên ku malbatê dabûn li hev kirin li gundê Porê hatibû veşartin.
Polîsên Şûbeta TEM’ê yên bi ser Midûrtiya Emniyetê ya Bajêr ve duh hatin gund û bi hinceta ‘DNA têrê nakin’ gora ku cenaze tê de bû vekir. Polîsan li gel doktorekî mînakên hestî û diranan standin û ji gund veqetiyan.
Xizmên Tabak, derbarê mijarê de ev agahî parvekirin: “Polîsan pêr bi telefonê li me geriyan û gotin ew ê gora Tabak vekin.” Polîsan ji bo mînaka DNA’yê, bangî ferdekê malbatê kirin ku biçe nexweşxanê mînakê bide û ji mablatê re jî gotin ku li gorî qeydên fermî Tabak hîna sax xûya dike.
Xizmên Tabak, bertek nîşanî vê rewşê dan û wiha got: “Cenazeyê me di encama testa DNA’yê de, dan me. Armanca wan ew e ku me bi saxî bikujin û zilmê li me bikin.” BEDLÎS
