Nuştox Riza Dalkiliço ke dewa Aynixe ya qezaya Pilemurîye ya Dêrsimî ra yo, kitabê xo yê bi nameyê ‘1938 de Pulumur’ weşana. Kitab de ca dîyeno wehşeto ke wextê Terteleyê Dêrsimî de Pilemurîye de qewimîya.
Nuştox Dalkiliçî 20 serrî seba kitabî cigêrayîşî kerdî û şahîdanê Terteleyî de qisey kerd. Kitab de derheqê kultur, cu û keyeyanê Dêrsimî de zî zanayîşî estî.
Dalikiliçî ard ziwan ke tay kesî zanenê ke Pilemurîye de çi qewimîyayo û vat: ”Şar vano qey Terteleyê Dêrsimî de Pilemurîye de qirkerdiş nêame kerdene û Pilemurîye paştî daye dewlete. La pîl û kokimê ma eqsê naye vanê. Merkezê Pilemurîye de cayêk esto ke 16 rîsipîyê Dêrsimî uca de bi hawayêkê komkî qetil bîyî û ameyî desfinkerdene. Dewê Pilemurîye ameybî vengkerdene û şar sugun bibi. Coka mi zehmetîye ante. La reyna zî mi xeylêk zanayîşî vistî destî. Mi goş na şahîdan û domananê şahîdan ser. Mi pêro jîyargeyî zîyaret kerdî. Seke mi panaromaya qije ya Pilemurîye viraşte. Ez kitabê xo yê diyînî de zî eşîranê Pilemurîye ser o vindera. ”
Dalkiliçî peynîya qiseykerdişê xo de wina vat: ”Pilemurîye de se bî se nêbî mi no nuşt. Seke mi şarê xo rê deynê xo da. Ganî komel bizano ke o çax se bibî.” DÊRSIM
