MEBYA-DERî vizêr dewa Çemê Elika ya qezaya Licê ya Amedî ke sey herêma Apê Musayî yena naskerdene de Goristanê Şehîd Harûnî ke 2013 de ame viraştene û 2015 de pê hêrişê hewayî û operasyonê leşkerî ame rijnayene, zîyaret kerd.
Îdarekarê merkez û qezayan ê Partîya Demokratîke ya Şaran (HDP) û Partîya Herêmê Demokratîkî (DBP), Aktîvîstê Tevgerê Cinîyanê Azadan (TJA) û temsîlkarê TUAY-DERî, û Komeleya 78an tewrê ci bîyî. Goristano ke pê bombardumanî ame rijnayene reya verêne ame pakkerdene û dima eşkerayîye ameye dayene.
Hemsereka MEBYA-DERî Yuksele Almas ke eşkerayîye de qisey kerd vist vîrî ke 2015 de goristanê Şehîd Amed û Şehîde Hêvîdare yê dewa Sîsê ya Licê ameyî bombardumankerdene û dima zî xeylêk cayan de goristanê gerîlayan ameyî rijnayene û vêşnayene.
Almase qiseykerdişê xo yê peyênan de daye zanayene ke bi nê hêrişan wazenê şarî bikerê bêîrade ci ra bifînê dûrî û wina vat: ”2020 de zî dinya vera janî mucadele kena la îqtîdarê AKP-MHPyî bi hêrişê vera goristanan rojdem de yo. Pê nê hêrişan yeno waştene ke şar bêvîr bimano û cewherê ci ra raqilîyo. Wazenê ke şarî bikerê bêîrade ci ra bifînê dûrî. Kurdîstan û Tirkîya pê goranê ke bê xeberdayîşê keyeyanê înan ameyî definkerdene bîyî pirr. Seba ke verê îradeyê komelkî bigerê cenazayan sey bêkes defin kenê. Nika Amed de 28 cenazayî goristanê bêkesan de pawenê ke keyeyanê înan rê bêrê teslîmkerdene. Meletî de 270, Wan de 75, Sêrt û Xarpêt 30 û bajaranê bînan de zî bi seyan cenazeyî nêameyî teslîmkerdene.” AMED
