Li Wargeha Penaberan a Şehîd Rustem Cûdî (Mexmûr) îro bi beşdarbûna 50 delegeyên jin Komîteya Jineolojî komxebatata xwe ya salekê bi dirûşma ‘Em bi jineolojî tevnê jiyanê raçînin’ destpê kir.
Komxebatê bi deqeyek rêzgirtina ji bo giyanê tevahî şehîdên Tevgera Azadiya Kurdistanê destpê kir. Piştî rêzgirtinê endama Komîteya Jineolojî Songul Guler axaftina vekirinê kir.
Guler di destpêka axaftina xwe de bi xêrhatina delegeyan kir û di derbarê armanc û girîngiya komxebatê de wiha got: “Di penabertiyê de nirxandina jinê û jineolojiyê bi rast jî serbilindiyeke. Em îro wek jinên penaber di bin hemû zorî û zehmetiyên jiyanê de kar û xebatê jineolojiyê dinirxînîn. Me jinan her tim siyaseta li cîhanê tê kirin, civak û her wiha zilm û zoriya li ser mirovahiyê têkirin nîqaş kiriye. Lê mixabin me tu carê xwe wek jin nîqaş ne kiriye. Her tim desthiladaran di nava jin û nasnameya wê de sînor danîne, ji ber vê yekê me tu caran nekariye ku vê derbas bikin û li nasnameya xwe xwedî derbikevin. Jinan bi xwedawendiya xwe zanist û civakbûn avakirine. Lê pergal û baweriyên heyî bi xeteke herî zirav xwestiye jinê û nasnameya wê tune bike. Ji bo ku ev yek pêk neyê pêwîst e em wek jin zanista jinê baş fêm bikin û bi tevahî jinên cîhanê bidin nas kirin.” MEXMÛR
