Dêrsîmo ke bi serran o yeno waştene ke elewîyê ci bêrê asîmîlerdene de serranê peyênan de bi paştdayîşê dewlete xeylêk tarîqatî binê nameyê komele, dezgehê paştdayîşî û waqifan de yenê ronayene. Platformê Hêzanê Kede û Demokrasîyî yê Dêrsimî Kuçeyê Sanatî de bi eşkerayîyêke protesto kerd.
Eşkerayîye de ame vatene ke Unîversîteyî seba ke bajarî hetê sosyal, ekonomî, kulturî aver şirê yenê ronayene la Ûnîversîteya Munzurî ronayîşê xo ra nata Dêrsimî ser o tesîro xirab keno û o îmajê tacîz û tecawuzî têna zirar unîversîte nêdano zirar dano bajarî zî.
Eşkerayîye de bale ameye anetene ser ke Rektor Ubeyde Îpek wendekaranê xerîban ê welatanê cîya cîyayan sey Fas, Somalî, Sûrîye, Arabîstanê Suîdî, Afganstan, Sûdan, Yemen, Lubnan, Fîlîstîn, Ozekîstan, Turkmenîstanî unîversîte de ca keno ke unîversîteyî sey baregehê tarîqatan şuxulneno û ame waştene ke o cade wezîfeyî ra bêro dûrîfînayene.
Binê eşkerayîye de morê nê partî, sendîka, komele û dezgehan esto: Sendîkaya Kedkaranê Xizmetê Sosyal û Weşîye (SES), Sendîkaya Kedkaranê Bûroyî (BES), EGÎTÎM SEN, TUM-BEL SEN, GENEL-ÎŞ, Partîya Kede (EMEP), Partîya Demokratîke ya Şaran (HDP), Partîya Sosyalîstanê Bindeste (ESP), CHP, Komeleya Heqê Merdiman (ÎHD), Federasyonê Komeleyanê Dêrsimî (DEDEF), Komeleya Kulturê Pîr Sultan Abdalî (PSAKD), Komeleya Elewêyê Demokratîke (DAD), DAM. Komeleya Paştdayîşê Cinîyan a Yenî Gunî, Komeleya Kultur û Xoza ya Dêrsimî û Înîsîyatîfê Sanatî yê Dêrsimî. DÊRSIM
