Navenda Nûçeyan
Çalakiya greva birçîbûnê ya bêdem û bidorveger ku girtiyên PKK û PAJK’ê di 27’ê Mijdarê de, ji bo bidawîkirina tecrîda li ser Rêberê Gelê Kurd Abdullah Ocalan dan destpêkirin, di roja 19’emîn de didome. Çalakiya grevê niha koma 4’emîn didomîne. Malbatên girtiyan, bi gotina ‘Daxwazên zarokên me daxwazên me ne’ piştgiriyê didin çalakiya grevên birçîbûnê.
Mehmet Kûrt ê 49 salî ku li Girtîgeha Tîpa T a Hejmara 2 ya Bunyan a Kayseriyê dimîne, bi rêya telefonê bi malbata xwe re axivî û qala binpêkirinên mafên mirovan ên li girtîgehê kir.
Kûrt diyar kir ku mafên wan ên mirovî hemû ji destê wan hatine girtin û wiha got: “Li gorî berê zext û zordariya li girtîgehan zêdetir bûne. Dest danîn ser radyo, televîzyon û rojnameyan nadin me.”
Hişyariya çalakiya grevê ya bêdorveger
Kûrt da zanîn ku heta daxwazên wan pêk neyên, ew ê çalakiya xwe ya greva birçîbûnê bidomînin û ev tişt anî ziman: “Ger çalakiya me ya bidorveger a greva birçîbûnê encam negire, em ê çalakiyê veguherînin çalakiya greva bêdorveger.”
Xizmên Mehmet Kûrt jî destnîşan kirin ku daxwazên girtiyan daxwazên wan e û xwestin ku demildest daxwazên girtiyan bên qebûlkirin.
Girtî Vedat Sevîm, Cengîz Oner û Mahmût Yamalak ên ku li Girtîgeha Tîpa T a Hejmara 2 ya Bunyana Kayseriyê dimînin, weke koma 4’emîn çalakiya greva birçîbûnê didomînin.
