Çewlîg
Çewlîg de vewre rayîrî girewtî. Qezaya Kanîreşî ya Çewlîgî de wesayîtêkî semedo ke rayîr de cemed virazîyabi nêzdîyê dewa Kalencîkî de qeza kerd. Wesayîtêkê bînî zî heman semedî ra dewa Ciligoyî ya Kanîreşî de qeza kerd. Qezaya Bongilanî de zî qican keyfê vewre vet. Qicê şefeqê sibayî ra vejîyayî teber mirda vewregud kay kerd û xo xij kerd.
Dêrsim
Dêrsim de bi taybetî qezayanê Pêrtag, Pilemurîye, Xozat û Pilurî de rayîrî vewre ra qefilîyayî. Ame parekerdene ke Xozat de vewre resaye 30 santîmetre. Hemwelatîyê bi nameyê Muslum Aktaşî pare kerd ke Dêrsim de vewre heta gulane esta û vat: ”Tîya de hînî heywankarîye zor a. Vewre ma rê zehmetîyan zî ana.”
Qezaya Pilemurîye de wesayîtêkî semedo ke rayîrî cemed girewt qeza kerd. Ambulanso ke seba birîndara kewtbi rayîr gina TIRî ro. Birîndarî pê ambulansêkê bînî wedarîyayî nêweşxane. Qezaya Pulirî de zî wesayîtêk kontrolî ra vejîya û leyê Çemê Munzurî bi. Ramitoxê wesayîtî Bahtîyar Çetîn wedarîya nêweşxane.
