Navenda Nûçeyan
Şeva 21’ê kanunê hikumeta Iraqê proje yasa budçeya 2021’an pejirand. Budçe ji 91 tirilyon û 790 milyar û 155 milyon dînar pêk tê. Li gorî budçeyê para başûrê Kurdistanê jî 12 tirilyon 482 milyar dînare dike ji sedî 12.67’ê budçeya Iraqê.
Elî Heme Salih da zanîn di vê rewşa siyasî ya di navbera Başûr û Bexda yê de heye, para Başûr bi vî rengî tiştek baş e. Elî diyarkir gelek hêsankarî ji bo Başûr hatine kirin. Pêwîste Başûr jî girêdayî lihevkirinê bimîne, neft û nîva dahatan radest bike daku muçeyê karmendan bixe garantiyê.
Li gorî gotina Elî Heme Salih, Başûr dikare bi çend rêyek sûd ji proje yasa budçeya Iraqê wergire. Ji ber ku bi çend rêyek dahata Başûrê ya li cem Hikûmeta Navendî digije nêzî 15 tirilyon dînar. Heme Salih got, ji bilî 12 tirilyon dînar para Başûrê di xerciya hakimî de 980 milyar dînare. Pereyê kirêya veguhestina 250 hezar bermîlên nefta Başûrê û 100 hezar bermîlên nefta Kerkûkê wê Hikûmeta Iraqê bide. Her wiha wê 17 milyon dolar ji bo projeya elektrîkê û 9 milyon dolar jî ji bo avê were dayîn.
Di dewamê de Elî Heme Salih got, li gorî datayên wezareta pilandanînê, Herêm ji sedî 13.93’yê Iraqê pêktîne. Lê di budçeyê de para Başûrê ji sedî 12.67’e û ev yek jî dikare bi rêyên danûstandinan were sererastkirin.
Di dawiyê de jî Elî Heme Salih got: “Ger Başûrê Kurdistan 10 tirilyon dînar jî wergire di berjewendiya Başûr de ye. Ji ber ku li gorî nirxê neftê yê niha dahata nefta Başûr nagije pênc tirilyon û li gel dahata navxwe jî nagije 7 tirilyon dînar. Ji başûrê Kurdistanê re jî 200 hezar bermîl neft dimîne. Ger pêdagiriyê li ser yasaya îdareya malî bike wê tenê ji sedî 50’yê dahatê radestî Bexdayê bike.”
