Merkezê Xeberan
Kişlaya ke wextê Terteleyê Dêrsimî de sey ‘merkez’ şuxilîyabi hetê dewlete ra bi nameyê ‘Muzeyê Tuncelî’ newe ra ameye akerdene. Dêrsimijî, rêxistin û dezgehê Dêrsimî seba ke muze îdeolojîya qirkere ya dewlete nîşan keno pê qayîl nîyê. Hunermendanê dêrsimijan zî vera muzeyî nêrazîbîyayîşê xo mojna.
Hunermend Metîn Kahraman vist vîrî ke vurîyayîşê kişla cara vernî ra rojdem de bi û vat: ”Ma wextêk kişla de festîval kerde, pêro dêsê ci boyax kerdî, tabloyê ressaman darde kerdî. Tede tîyatro û konserî virazîyayî. Dima dewlete mudaxele kerd û kişla vurnaye muzeyê winasênî.Dima ke Erdoganî şarê Dêrsimî ra uzrê xo waşt nameyê Dêrsimî zêdêr ame qebulkerdene. La ewro reyna nameyê Dêrsimî mehkemeyan de beno mesele. Ganî Terteleyê Dêrsimî bibo muzeyê vîrî. Seba ke muzeyê Tuncelî wina bibo ma do têkoşînê xo dewam bikerê.”
Hunermend Ferhat Tunçî vat: ”Na kişla de rêçê Terteleyê Dêrsimî estê. Terteleyî ra nata xîret yeno kerdene ke Dêrsim newe ra bêro dîzaynkerdene. Na kişla ganî bibîyêne merkezê şermî. Davutogluyî vatbi ke no ca do bibo ‘Muzeyê Dêrsimî.’ Înan sozê xo vîr a kerd û bi hawayêkê topyekunî prosesê înkar, asîmîlasyon û qirkerdişî da destpêkerdene.”
Erdogan Emîrî vat: ”Eke şima seke pê dejê şarî yarî kenê nê cayî bikerê muze şima o çax qirkerdişan kenê fîraz. Bi nê hawayî vîrê komelî de travmayêka newîye virazîyaye.”
