Her serra newîye de, krîtîkê serra ka vêrta û yê serra ke yena beno. Rayna her kes goreyê fikr û îdeolojîyê xo, nê krîtîkan keno. Goreyê mesajê tayê merdiman, serra 2020î; yew serrêka bîyom a. Goreyê tayê merdiman; sankî nêweşîye, pîsey, rindey, felaketî, cengî, xizaney û krîzê ekonomîye; serra 2020î ra, yanî teqwîmê/serranameyê serre ra yenê meydan. Yanî heme sucan, wenanê serra 2020î. Halbikî no suc, aîdê serran, yan zî ê teqwîman nîyo. Yanî nê meseleyî, bi destê merdiman, dewletan û sazîyan awan benê. Eke cîhan de cengî benê û ciwanî zeh benê, no qeder nîyo. Nê cengî; bi îradeyê tayê merdiman, yan zî zumreyan benê. Nê cengan de; tayê merdimi, rotişê çekan ra pere qezenc kenê, tayê merdimî zî rantê îqtîdarî ra îstîfade kenê. Eke yew ceng; seba heq-huqûq û edaletî nêbo, no ceng yew cînayeto tewr pîl o.
Serra 2020î de nêweşîya Koronayî bîya belayê sereyê merdimanî. Yewna het ra serra 2020î de cîhan de zaf cayan de şer û pêrodayîş virazîya. Na serre de semedo ke krîzê ekonomîye bîyo; karker û karmendî gure ra ameyê vistiş. Esnafan, citkaran û miqetkerdoxanê heywanan îflas kerdî. Dolar û mark qîymet girewtî. Pereyê Tirkîya qîymetê xo vînî kerdo, bîyo panc quruş. Meaşê karkeran û karmendan, qîymetê xo vînî kerdo. Tayê merdiman zî serra 2020î de nêweşîya korona, ceng û krîzê ekonomîye sey yew firset dîyî, serweta xo kerdî diqat, hîrê qat. Serra 2020î de; cangan de tayênî çekî/silehî rotê, villakerdişê gonî ra pere qezenc kerdî, la ciwananê xizanan nê cengan de ganîya xo vînî/vîndî kerd.
Serra 2020î de yew het ra zerreyê Tirkîya de yewna het ra teberê Tirkîya de, operasyonê leşkerî dewam kerdê. Tirkîya, zaf cepheyan de dekewtbî cengan. Tirkîya; Başûr de, Rojava de, Libya de û tewr peynî de, Qerebqax de dekewtbî ceng. Semedo ke Tirkîya; Rojawayê Behrê Sipîyî û Behrê Egeyî de neft/petrol geyraybî û Meraşê Qibrisî sivîlan rê akerdbi; Mîyanê Tirkîya û Yewnanîstanî de yew atmosfera krîzê leşkerî û sîyasî vejîyaybî.
Semedo ke Tirkîya, şuxulnayîşê S 400an de israr kena; Yewîya Amerîka, mueyîdeyê CAATSAyî îlan kerd. Yewna het ra, Mehkemeya Heqanê Mêrdiman a Ewropa, semedo ke Hemserekê HDPyî yê verî, Selahattîn Demîrtaş hepisxane ra vejîyo, yew qerar dabi. Mehkemeyan, bi talimatê Serekkomar Erdoganî, Birêz Demîrtaş zindan de edilnayo. Yew het ra Serekkomar Erdogan; behsê reforman keno, la yewna het ra zî huqûqê Mîyanneteweyî û ê zerrîye dekeno binê payanê xo.
Tirkîya de, îqtîdarê AKP-MHPyî; nêweşîya Korona ra îstîfade kerdo, adeta vengê mûxalefetî birnayo. Bi taybetî wekîl, şaredar û îdarekerê HDP û BDP tede bi hezaran sîyasetkar û aktîvîstan dekerdê zîndanan. Mûxalefet rê adeta kuçey û meydanî qedexe kerd. Lîderê Mafya Alaattîn Çakiciyî, bi yew mektubî/nameyî; Kemal Kiliçdaroglûyî bi kiştişî tehdit kerdo. Hetan eyro, no xusus de, dadgeran û dozgeran ra qet veng nêvejîyayo. Çi heyf ke, Tirkîya de meydan; merdimanê mafya rê mendo. Çi heyf ke hinê Tirkîya de heq, huqûq û edalet nêmendo.
Dewleta Tirkîya, bi nê zîhnîyet û bi na polîtîkaya xo, hem zerreyê Tirkîya de, hem zî teberê Tirkîya de, krîzanê sîyasîyan û yê ekonomîye vejena. Dewleta Tirkîya, meseleyanê xo ê zerrî çareser bika, Teberê Tirkîya de problemî asan çareser benê. Ay wext, meseleye ekonomîye, hina asan çareser benê. Dewleta Tirkîya wazena ke meseleya kurdan, şîddet û zorî reyde çareser bika. Na polîtîkaya Tirkîya; sîrayetê polîtîkaya mîyaneteweyî zî kena. Bi hîvîya aşîtî, demokrasî û azadî, ez serra neweyê heme wendoxan pîroz kena.
