Merkezê Xeberan
Çalakîya grevê vêşanîye yê bêdem û bêagêrayîşî yo ke tepişteyanê sîyasîyan 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê PKKyî Abdullah Ocalanî û binpaykerdişê heqanê tepişteyan dabi destpêkerdene, roja 42. de dewam keno.
Mexmûr
Kampa Mexmûrî ya pabesteyê bajarê Musilî ya Iraqî de zî vera tecrîdkerdişê Rayberê Şarê Kurdî Abdullah Ocalanî de bi serkêşîya cinîyan grêvê vêşanîye dîya dest pêkerdene. Çalakîya Komeleya Keyeyê Şehîdan yê Mexmûrî roja 21. de dewam kena.
2012: 68 Roj
Yewine çalakîya grevê vêşanîye ke vera tecrîdê serê Ocalanî de dîya destpêkerdene 12ê Êlula 2012î de virazîyabî. Çalakî 68 rojan dewam kerd û badê vengdayîşê Rayberê PKKyî Abdullah Ocalanî qedîya. Netîceyê çalakîyan de 3ê çeleyê 2013î ra heta 2015an mabenê dewlete û Ocalanî de prosesê dîyalogî dest pêkerd.
2018: 200 Roj
Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kerde. Dima ra 16ê Kanûne de zîndananê Tirkîye de zî çalakîya grevê vêşanîye dest pêkerdî û 1ê Adare de zî vilayê pêroyê zindanan bîye. 15 hepsîyê PKK û PAJKî 30ê Nîsane de çalakîya xo derbazê merheleyêka newe kerdî û rojeyê mergî dayî dest pêkerdene. Dima ra zî 10ê Gulane de grûba diyîn ke a zî 15 hepsîyan ra pê ameyêne semedê şikitişê tecrîdê serê Ocalanî dest bi rojeyê mergî kerde. Grevê vêşanîye ê Guvene 200 rojan dewam kerd.
Hetê bînî ra xoverdayîşê endamê temsîlkarîya HDPyî yê Başûrê Kurdistanî Nasir Yagizî zî bi eynî amancî sey grevê vêşanîye yê bêdem û bêagêrayîşî dest pêkerd. Endama Meclîsê Îştarî Fadîle Toke zî tewrê no çalakîye bibî. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye virazîyayî.
Xoverdayîşê Strasbourgî yê 14 çalakwanan û Galler de Îmam Şîşî zîewropa de dest bi çalakîye kerdî. Bajarê Toronto yê Kanadayî de zî Yusuf Îba tewrê çalakîye bî. Parlementera HDPyî Dersîm Dage 3ê Adare de, Tayîp Temel û Murat Sarisaçî 8ê Adare de awanîya HDPyî de dayê destpêkerdene.
Kesê ke seba şermizarkerdişê tecrîdî cuya xo peynî kerdî
Sewbîna teberê welatî de bajarê Krefeldî yê Almanya de 20ê Sibate Ûgûr Şakarî hemverê tecrîdî de adir verda bedenê xo û 22ê Adare de cuya xo kerde vînî. Zulkuf Gezenî (33) 17ê Adare de hemverê tecrîdî de Zîndanê Tîpa F-2 yê Tekîrdagî de, Ayten Beçete (24) 23ê Adare de Zîndanê Gebze de, Zehra Saglame (23) 24ê Adare de Zîndanê Tîpa Tyî yê Otlû de, Medya Çinare (24) 25ê Adare de Zîndanê Tîpa Eyî yê Mêrdînî de peynî ro cuya xo arde. Yonca Akici 29ê Adare de Zîndanê Şakranî yê Cinîyan de çalakî viraşte û 1ê Nîsane de cuya xo vindî kerde. Siraç Yuksekî zî 2ê Nîsane de Zîndanê Tîpa T-2yî yê Osmanîye de û Mahsûm Pamayî zî 5ê Nîsane de Zîndanê Xarpêtî yê bi Asayîşê Berzî de bi heman amacî çalakî viraşte û cuya xo kerde vînî. AMED
