Çewlîg de 4 rojîyo ke deyîrbaz Denîz Ayazo (35) ke veyveyan de deyîran vatêne ra xebere nêameyêne girewtene. Keyeyê Ayazî ke vindîbîyayebî muracatê cendirmeyan kerd.
Semedê Ayazî xebatê cigêrayîşî dîya dest pêkerdene. Vizêr dewa Hecî Çayirî ya pabesteyê merkezê Çewlîgî de mîyanê xêşeyê eşteyî de cenazeya camêrdêk ame vînayene.
Tîmê cendirmeyan şîyî cayê serebutî û goreyê tespêtê ewilî ame vatene ke cenaze aîdê deyîrbaz Denîz Ayazî ya.
Ame vatene ke Ayazî bi guleyê çekî ameyo kiştene û cenaze semedê otopsî wedarîya morgê Nêweşxaneyê Welidnayîşî û Nêweşîyê Domanan yê Çewlîgî.
Kesêk ame tepiştene
Derheqê tehqîqato ke semedê vînayîşê qetilkarê Ayazî ame akerdene de kesêk bi nameyê S.A.yî Xarpêtî de ame tepiştene. Keyeyê Ayazî no kesî ra şikan keno û no kes eynî wext de koma deyîrî yê Ayazî de bî. Ame zaneyene ke S.A. do bişirawîyo Çewlîgî. ÇEWLÎG
