Desteya Rêveberiya Navenda Sendîkaya Xizmeta Kedkarên Tenduristî û Civakî (SES) bi civînek çapemeniyê aşkera kir ku ji bo seranserî meha çileyê plana çalakî û şahiyan bi dirûşma ‘Maske diaxivin’ dane destpêkirin. Daxuyanî li Navenda Giştî ya SES’ê pêk hat û pankarta ‘Maske diaxive’ daliqandin. Di civînê de hevseroka SES’ê Selma Atabey daxuyanî da û diyar kir ku sendîkaya wan ji destpêka ve ji bo tenduristî û silametiya civakî li dijî koronayê têdikoşe û ew li aliyê din jî ji bo tenduristiya xwe, mafên xwe û keda xwe têdikoşin.
Atabey anî ziman ku pirsgirêkên kedkarên tenduristiyê bi salan e berdewam dikin, bi şewbê re pirsgirêk zêdetir bûne û ji destpêka şewbê ve heta niha 339 kedkarên xizmeta tenduristî û civakî jiyana xwe ji dest dane û bi sed hezaran jî nexweş ketine.
Atabey diyar kir ku ji bo ew bijîn dengê xwe bilind kirine lê kesî qîrkikirên wan nebihîstiye û wiha got: “Ev zîhniyet gotin û çalakiyên me ji nedîtî ve tê. Em li dijî vê nêzîkatiyê seranserî meha çileyê ji bo belkî maskeyên me bibînin, bibihîzin çalakî û şahiyên ‘maske diaxivin’ li dar dixin. Em ê bi vi çalakiyan hewl bidin têkoşîna xwe derxin astek din û destkeftiyan qezenc bikin. Em ê hemû gilî, gazin û daxwazên xwe bi maskeyên xwe bînin ziman. Em ê bi giştî 4 hefteyan li ber kargehan, li xwaringehan, li eywanên civînan çalakiyên rûniştinê yên bêdeng û daxuyaniyan bidin. Em ê hewl bidin ji bo dengê me yê ku daxwazên me li ser maskeyên me nivîsandinên were bihîstin. Em ê her hefte daxwazên xwe bînin ziman. Em dixwazin her kes piştevaniya çalakiyên me bike û dengê me bigihînin tevahiya welat.” ENQERE
