Navenda Nûçeyan
Piştî civînê berpirsekî PDK’ê diyarkir wan li ser avakirina lîstek hevbeş li gel Yekgirtûy Îslamî axivîne. Lê berpirsê Yekgirtûy Îslamî vê yekê red kir.
PDK di çarçoveya amadekariyên ji bo avakirina lîstek hevbeş a hilbijartinên Iraqê de dest bi hevdîtinên li gel partiyên siyasî yên başurê Kurdistanê kiriye. Di vê çarçoveyê de di saetên êvarê de şandeyek ji endamên polîtbûyroya PDK’ê serdana Yekgirtûya Îslamiya Kurdistanê kirin.
Piştî civînê Endamê Serkirdayetiya PDK’ê Elî Hisên, têkildarî naveroka civînê ji çapemeniyê re axivî û got, wan di civînê de li ser rewşa Iraq, başûrê Kurdistan û avakirina lîstek hevbeş a ji bo hilbijartinên parlementoya Iraqê axivîne.
Berdevkê Yekgirtûya Îslamiya Kurdistanê Xelîl Îbrahîm jî diyarkir ku wan di civîna li gel PDK’ê de qet behsa avakirina lîstek hevbeş nekiriye, tenê hevdîtinek dostane bû.
Tê payîn ku sibe PDK li gel Hizba Şue ya Kurdistanê bicive, roja 14’ê çile jî li gel YNK’ê bicive. Hefteya bê jî li gel Tevgera Goran, Komela Îslamî û partiyên din bicive.
