Koordînasoyna Şopandina Greva Birçîbûnê ya ji aliyê Komeleya Mafên Mirovan (ÎHD), Yekitiya Tabiban a Tirk (TTB), Komeleya Hiqûqnasên Azadîparêz (OHD), Weqfa Mafên Miroavan a Tirkiyeyê (TÎHV) û Komeleya Hiqûqnasên Hemdem (ÇHD) ve hatiye avakirin civîna çapemeniyê li dar xistin.
Hevserokê ÎHD’ê Ozturk Turkdogan anî ziman ku heta niha greva birçîbunê li 107 girtîgehan belav bûye û wiha got: “Girtî li girtîgehan bi armanca tecrîd û îzolasyona li Îmraliyê ku didome bi dawî bibe, ketine greva birçîbûnê. Ji 27’ê Mijdara 2020’an heta niha girtî bi awayekî bêdem û dorveger ketine grevê û çalakiyê didomînin. Demek dirêj e li girtîgehan binpêkirina mafan didome.”
‘Divê tecrîd bi dawî bibe’
Turkdogan diyar kir ku berê jî girtiyên siyasî ji bo Îmraliyê ketibûn grevê û ev tişt anî ziman: “Bi van çalakiyan ji bo demekê tecrîd rabûbû. Lê dîsa piştî 7’ê Tebaxa 2019’an hevdîtinên li Îmraliyê hatin qedexekirin. Ev yek li dijî Rêgezên Mandela Yên Neteweyên Yekbûyî û daxwazên CPT’ê ne. Dîsa li dijî zagona înfazê ya hêjmar 5275’an e. Em bang li Wezîrê Dadê dikin ku demek berî demekê tevrîdê bi dawî bikin. Divê parêzer û malbat karibin biçin hevdîtinan bikin. Em bang li Wezareta Dadê, Wezareta Tenduristiyê, Komîsyona Lêkolîna Mafên Mirovan a Meclisê û Saziyên Şopandinê yên Cemaweriyê dikin ku erka xwe pêk bînin.
Divê wezareta dadê ji bo dawîkirina tecrîdê gavan bavêje. Em saziyên heq û hiqûqê ji bo girtiyên li 107 girtîgehan dest bi çalakiyê kirine, tenduristiya wan nekeve xeteriyê û dawî li çalakiyê bînin, divê Wezareta Dadê tecrîdê bi dawî bike. Em bang li wezaretê dikin ku ji bo vê yekê gavên şênber bavêje.” ENQERE
