Li paytexta Afganistan Kabûlê li dijî 2 dadgerên jin ên ji Dadgeha Bilind êrîşeke çekdarî pêk hat. Têkilarî êrîşa çekdarî Berdevkê Dadgeha Bilind Ahmed Faehîm Kavîm axivî û diyar kir ku di encama êrîşa çekdarî de du dadgerên jin jiyana xwe ji dest dan û ajokarên wan jî birîndar bûn.
Berdevkê diyar kir ku her du dadgerên jin serê sibehê dema ku diçûn ser karê xwe, bûn hedefa êrîşa çekdarî.
Berdevkê Midûriyeta Emniyetê ya Kabûlê Ferdaws Farmarz jî ragihand ku êrîş li gorî dema herêmê saet di 08:30’î de li navenda bajêr pêk hat.
Li gorî çavkaniyên dadgehê, li Dadgeha Bilind zêdeyî 200 dadgerên jin hene.
Li Afganistanê hefteyên dawî xebatkarên medyayê, siyasetmedar û parêzvanên mafên mirovan jî di nav de gelek kes bûn hedefa êrîşan.
Rayedarên afgan, tevgera Talîbanê weke berpirsyarê van êrîşan dibîne. Lê belê heta niha çeteyên DAIŞ’ê berpirsyariya hin êrîşan girtin ser xwe.
Her wiha artêşa Amerîkayê yekem car hefteya derbasbûyî Talîban weke berpirsyarê êrîşan nîşan da. KABÛL
