Navenda Nûçeyan
Hêzên Rûsyayê nûqteyek leşkerî li hember nûqteya dewleta tirk li Seraqibê ava kir, her wiha nûqte 50 metre dûrî cihên hêzên hikûmeta Şamê ye.
Li gorî Navenda Çavdêriya Mafên Mirovan a Sûriyê (SOHR), hêzên Rûsyayê endamên hêzên hikûmeta Şamê ji wê deverê dûr xistin da ku navbera wan û çeteyên dewleta tirk de şer çênebe. Di heman demê hêzên dagirkeriya tirk çeteyên xwe jî ji wê deverê dûr xistin.
Berî du rojan dagirkeriya tirk nûqteyek leşkerî nêzî gundê Afis a li bakurê bajarê Seraqibê ya di bin kontrola hêzên hikûmeta Şamê de, ava kir.
Dagirkeriya tirk çekên giran anîn nûqteya nû. Her wiha ev nûqteya 65’an a ku dagirkeriya tirk li herêmên “bê çek” ava dike.
Ji aliyekî din ve jî, hêzên hikûmeta Şamê, cihên çeteyên dewleta tirk li herêmên “bê çek” topbaran kir.
Hêzên hikûmetê şeva duşemê deverên li Filêfil, El-Barê, Bînîn, El-Fetîra yên li beşa başûrê gundewarên Idlibê û hin deverên li Sehil Xab a li bakur rojavayê Hemê bi moşkan hedef girt.
