Navenda Nûçeyan
Di havîna sala 2015’an de Kovara Îlyan bi 118 rûpelan dest bi weşanê kir. Heta sala 2017’an 6 hejmarên kovarê hate çapkirin. Piştre ji ber rewşa xerab a aborî weşandina kovarê hate rawestandin. Xwediyê kovarê bi xwe xerca çapê dida û parvekirina wê jî li ser milê wan bû.
Xwediyê Kovara Îlyan Aram Semîn got;”Piştî sê salên rawestandina kovarê ya ji ber rewşa darayî wê hejmara nû ya Kovara Îlyan were weşandin. Wê bi bername û planek nû dest bi weşana xwe bike û wê projeya me berdewam bike. Kovara Îlyan li ser du astan kar kiriye. Ji wergera çîrok, mijaran û çîrokên hemû zaravayên kurdî pêk tê.”
Aram da zanîn ku di kovarê de bi 9 zimanên; fransî, îngilîzî, swêde, rusî, erebî, farisî, spanî, tirkî û almanî, mijar bi zimanê kurdî hatine wergerandin. Heya niha nêzî 400 çîrok ji bilî gotar û hevpeyvînan hatine wergerandin.
Aram Semîn derbarê hejmara nû ya kovarê de jî got; “Niha hejmara 7 ya kovarê bi 425 laperan ku tê de çîrok, xwendin, hevpeyvîn û lêkolîn heye, ji çapxaneyê derketiye. Di rojên bê de wê kovar bigihe pirtûkxaneyên rojhilat û başûrê Kurdistanê.”
Li ser bergê hejmara nû ya kovarê wêneyek serokkomarê tirk Receb Tayîp Erdogan hatiye danîn û di destê Erdogan de jî wêneyê zarokên ku di bombebaran û dagirkeriya dewleta tirk de jiyana xwe ji dest dane, heye.
Aram Semîn derbarê wêneyê Erdogan de jî got; “Ev girêdayî xebata çandî û ferhengî ya bi xebata netewiye. Ji ber ku di kesayeta Erdogan de tevlîhevî û faşîzm li rojhilat, rojava û kevneperestiya olî û rêgezperestî tund bûye.”
