Buroyê Huqûqî yê Asrinî mesajê Rayberê Şarê Kurdî Abdullah Ocalanî yê 18ê Hezîrane pare kerd
Buroyê Huqûqî yê Asrinî detayê pêvînayîşê xo yê 18ê Hezîrane dayî û mesajê Rayberê Şarê Kurdî Abdullah Ocalanî pare kerd.
Eşkerayîye de nê ameyî vatene: “Ma 18ê Hezîrane de muwekîlê xo dir pêvînayîş kerd û sey pêvînayîşanê bînan Birêz Ocalanî rojdem ercna û derheqê babetanê muhîman de fikre xo pare kerdî. Birêz Ocalanî metînêk zî nuşt û waşt ke no metîn sere de bidîyo muhatabê ci yo verên HDP. Ma zî wina kerd. Wa no zî bêro zanayene ke ma metîn bê mûhataban kesêkê bînî nêda. Ma plan kerdbi ke nê metînî roja Îne rayapêroyî dir pare bikerê. Gama ke ma amadekarîya eşkeryayîye kerdêne, ma parekerdişê keso bi nameyê Alî Kemal Ozcanî dîyî. Çîyê ke Ozcanî vatî ey gire danê. Ma heta ke muwekîlê xo dir pêvînayîş nêkê ma nêeşkenê naye teyît bikê û cewabê ci bidê. Nuşteyê Birêz Ocalanî yê pêvînayîşê 18.06.2019 ma rayapêroyî dir pare kenê.
Mesajê Rayberê Şarê Kurdî Abdullah Ocalanî
Rayapêroyî rê vengdayîş
Derheqê însîyatîfê mi yo şexsî yo ke bi wesîleya qedîyayîşê rojeyê mergî û grevê vêşanîye mi şuxulna, mi hewcedarîya nê eşkerayîye dîye.
Mi derheqê demê çareserîye de qalê tewirêkê hîna xori û zelal kerd. Ez nê perspektîfî ra ewnîyaya qewimîyayîşan ra. Dimayê demê çareserîye vejîya werte ke pêkewtiş û ciyakerdiş probleman çareser nêkeno. Vera îtîfaqanê Cûmhûr û Mîlletî îtîfaqo demokratîk o ke HDPyî de xo îfade keno û pabesteyê ci opsîyonê muzakereyê demokratîkî çareserî esas girewto. Demê vernîya ma de senî ke eyseno hem hetê cimatkî, hem zî hetê herêmkî û globakî ra problemî do hîna bibê xorî. Tîya de pawitişê tewirê nê rayîrê hîrêyin zaf muhîm o û manaya ci gird a. Na çarçewe de îtîfaqo demokratîk o ke HDPyî de xo îfade keno ganî muneqeşayanê weçinitişî de hetêk mebo. Îtîfaqo demokratîk ganî sey tim xeta xo ya bêhet de israr bikero. Platformê sîyasî yo tewr raşt û peynîgiretox oyo ke xeta werêameyîşê demokratîkî, sîyasetê azadî û huqûqê evrenseli de yo. Ez veng dana heme hetanê eleqedaran ke wa na çarçewe de hîsgêr bê.
Abdullah Ocalan
18.06.2019
Zîndanê Îmrali / Bûrsa” STENBOL
