Hepsî Musa Adsizo ke Zîndanê Xarpêtî de vera îşkence, muameleyanê xirab û binpaykerdişanê heqan de çalakîya rojeyê mergî de bî, badê ke mudirîya zîndanî ci reyde pêvînayîş kerde çalakîya xo peynî kerd
Hepsîyê Zîndanê Xarpêtî Hûmara 1. Musa Adsizo ke hucreyêko yew kesî de ameyêne tepiştene û raştê îşkence, muameleyanê xirab û binpaykerdişanê heqan ameybî 29ê temmuza 2019î ra nata çalakîya rojeyê mergî de bî. Badê ke mudirîya zîndanî Adsizî reyde pêvînayîş kerde û şertanê ci qebûl kerde, Adsizî çalakîya xo peynî kerd. Adsizî bi rayîrê keyeyê xo malumat da û dîyar kerd ke mudirîya zîndanî verê cû ci reyde pêvînayîş kerda û şertanê ci qebûl kerda. Badê ke şertê ciameyî qebûlkerdene zî çalakîya xo peynî kerdo.
Dayîka Mehmetî Radda Adsize derheqê pêvînayîşî de qisey kerde û va: “ Ez ewro lajê xo reyde qisey kerda. Yew aşmî yo ke îşkence bi lajê mi yeno kerdene. Hema zî şopê îşkenceyî bedenê lajê mi de estî. Lajê mi zaf kîlo dayo. Nêweşîyê ci yê fîzîkî û ruhî zêdîyayî. Badê ke mudir sozê başkerdişê şert û mercê ci dayo, lajê mi çalakîya rojeyê mergî peynî kerdo. Lajê mi da zanayene ke eke mîyanê 10 rojan de waştişê ci nêrî caardene do reyna dest bi çalakî rojeyê mergî bikero.” AMED
