Li tevahiya bajar û herêmên rojhilatê Kurdistanê doh agirê Newrozê hat pêxistin. Serhildana ‘Jin, Jiyan, Azadî’ bi agirê Newrozê gur bû, reng û dengê jinên azad bilind bû.
Li bajarê Seqizê serdana goristanan hat kirin. Bi taybetî bi sedan kes tevî malbata Jîna Emînî, çûn ser gora jina ciwan ya kurd. Jîna Emînî li ser gora xwe hat bîranîn û Newroz li hemû kesên di xwepêşandanan de hatine kuştin, hat pîrozkirin.
Di merasîmê de sirûdên şoreşgerî, dirûşmeyên li dijî desthilatdariyê hatin qîrîn. Ji bo geşkirina serhildanê bang hat kirin. Li heman bajarî li ser serê çiyê bi agir navê Rêberê Gelê Kurd Abdullah Ocalan hat nivîsandin.
Li bajarên Sine û Bokanê jî dayikên zarokên wan hatine qetilkirin, bi dirûşma ‘Jin, Jiyan, Azadî’ û ‘Şehîd namirin’ Newroz pîroz kirin û li ser goristanan zarokên xwe bi bîr anîn.
Doh bi şev li bajarên Sine, Mahabad, Pîranşar, Şino, Bokan, Seqiz, Dêwlan, Kamyaran û gelek herêmên din, ciwan daketin kolanan û bê navber dirûşma ‘Jin, Jiyan, Azadî’ qîriyan. Ciwanan nerazîbûn nîşanî desthilata Îranê dan.
Li gorî agahiyan û dîmenên hatine belavkirin, li bajarên Sine, Dêwlan, Bokan û Seqizê di navbera ciwan û hêzên dewletê de ji ber êrîşa hêzên Îranê alozî çêbûye û gelek xwepêşander birîndar bûne.
